Stuorra beroštupmi guobbariidda

Porsáŋggu guoppar- ja ávkešaddosearvvi interimstivrra jođiheaddji, Ingrid Golten, lohká ahte beroštupmi borrat guobbariid Porsáŋggus orru lassáneamen vaikko ii han dáppe gal leamašan vierrun čoaggit guobbariid maid olbmot vel borret. Dáppe leat olbmot baicce eambbo geavahan eará šattuid. Dat njálgámus guobbarat leat kantarellat mat šaddet soahkevuovddis. Jos olmmoš gávdná kantarellaid de gal ii geasage muital gos daid lea gávdnan.

Stuorra beroštupmi

Olbmot Porsáŋggus borret ollu guobbariid ja doppe leat maid oahpahuvvon guoppardárkkisteaddjit geat sáhttet iskat ja muitalit makkár guobbariid olmmoš sáhttá borrat. Gieskat lágidii Porsáŋggu guoppar- ja ávkešaddosearvi miellahttučoahkkima ja beaivvi maŋŋá čoahkkima de lágidii searvi guopparohcanmátki Luobbalii masa badjel 60:s serve.

Ollu mineralat

Guobbariid berrešii olmmoš borrat danin go dat lea borramuš man ii dárbbaš fievrridit máŋggaid miillaid, dat gávdno guovllus gos olmmoš ássá. Guobbaris leat maid ollu minerálat maid olmmoš dárbbaša, lohká Porsáŋggu guoppar- ja ávkešaddosearvvi interimstivrra jođiheaddji Ingrid Golten.

Váralaš guobbarat eai gávdno Finnmárkkus

Finnmárkkus gal eai gávdno dakkár váralaš guobbarat mat sáhttet dagahit olbmo nu buohccin ahte vel dan dihti jápmá. Dákkár guobbarat gávdnojit mátta Norggas, Vestlánddas máttás guvlui. Dáid guobbariid gaskkas leat njeallje guopparšlája mat buktet servvodahkii ollu lassigoluid. Dán dihti ferte olmmoš buohccivissui gos ferte oaččut ođđa monimuččaid dahje vuoivasa eará olbmos, lohká Norgga guoppardárkkisteddjiid oktiiordnejeaddji Anne Dorthe Sunde. Dat váraleamos guobbarat Norggas leat vilges čurotguoppar, ruoná čurotguoppar ja dárogillii spiss giftslørsopp ja butte giftslørsop. Jos okta diein guobbariin gávdno eará guobbariid gaskkas de fertejit buot bálkestuvvot danin go das lea dan mađe ollu mirku ahte jos dušše veaháš das ribahat borrat de sáhtát gártat duođalaš dillái, lohká Norgga guoppardárkkisteddjiid oktiiordnejeaddji Anne Dorthe Sunde.

Mearrasápmelaččat eai viega guobbariid maŋis

Solveig Tangerås, gii ássá Kolviikkas, lohká ahte son borrá guobbariid dalle go deaivá leat vuoššan ealgabierggu. Solveig mielas gal guobbarat eai leat nu njálgá ahte daid maŋis gánnáha viehkat. Dán áššis gulat vel maid Jovsset Ohtu lea Solveigii muitalan guobbariid birra. Dát fearán galgá leat dáhpáhuvvan sullii 100 jagi dassái.