Stuora beroštupmi searvat Sámi Grand Prixii

Sámi stuorámus lávlun- ja juoigangilvu geasuha artisttaid. Sámi Beassášmárkaniid jođiheaddji Ken Are Bongo lea hui duhtavaš.

Inger Karoline Gaup

BEASSÁŠDOALUT: Dán jagi háliidit ollugat Sámi Grand Prix lávdái. Govas lea Inger Karoline Gaup. Son lea vuoitán SGP:a loahppagilvvuid guovtte geardde.

Foto: Marianne Boine / NRK

Oktiibuot leat artisttat sádden 23 lávlaga ja 14 luođi ovdal dieđihanáigemeari, mii lei gaskaija áigge guovvamánu 11.beaivvi.

– Šaddá hui váttis válljet artisttaid loahppagilvvuide, go leat nu ollu buorit lávlagat ja luođit, lohká Bongo.

Ken Are Bongo

DUHTAVAŠ: Ken Are Bongo mielas lea buorre go nu ollu riikkat servet.

Foto: Ol Johan Gaup

Dušše guhtta lávlaga ja logi luođi besset oasálastit Báktehárjjis Guovdageainnus beassášruohta.

Ođas dán jagi lea ahte Ávvir áviisa sádde gilvvu neahtas. Sátta lea rabas buohkaide nuvttá.

– Dat lea danin vai olles Sápmi beassá čuovvut loahppagilvvuid, čilge Bongo.

Sámi Grand Prix lágiduvvo 31. geardde dán jagi.

Sápmelaš ii goassige doama

Ken Are Bongo lei guhká balus ahte olbmot eai dieđit iežaset Sámi Grand Prix:ii. Álggos ii orron áktánas beroštupmi.

– Muhto ikte eahkedis justa ovdalaš áigemeari vuostáiválddiimet maŋimuš artistta jietnabihtá, reaškkiha son.

Bongo lohká maid ahte sii han gal dihtet makkár sápmelaš lea. Ii sus leat nu hoahppu.

Artisttat geat gerge sáddet iežaset musihka bohtet miehtá sámi.

– Mun lean hui duhtavaš go artisttat leat sihke Norgga-, Ruoŧa-, Suoma- ja Ruošša sápmelaččat, lohká son NRK Sápmái.

Beassášruohta maid juhkkojuvvo Áillohaš musihkkabálkkašupmi.