– Mu mielas lea vahát go Jelena Porsanger ii dáhto šat joatkit rektorin, go mis lea leamaš hui lagaš ovttasbargu suinna. Son lea leamaš hirbmat čeahppi vuoruhit studeanttaid. Danne šaddá váivi go son heaitá. Mun livččen sávvan, ahte son livččii joatkán, lohká Sámi allaskuvlla stivrralahttu Mikkel Rasmus Logje.
Logje ja Berit Marie E. Eira válljejuvvuiga diimmá guovvamánus Sámi allaskuvlla studeanttaid áirrasin stivrii. Sutno várrelahttut leaba Sergey Gavrilov Karen Marit V. Siri.
– Guokte buori evttohasa
48-jahkásaš Jelena Porsanger lea bajásšaddan Ruošša beale Guoládagas. Son lea bargan Sámi allaskuvllas jagi 2010 rájes ja álggii rektorbargui jagis 2011 rájes.
Son vástidii, ahte ii dáhto šat joatkit rektorvirggis go gieskat jerrojuvvui. Dan son dahká go baicce háliida vuoruhit akedemalaš bargguidis.
– Dan maid mun lean áigá jo mearridan lea, ahte go mu rektoráigodat nohká de mun baicce áiggon vuoruhit profeassorkvalifiserema,
Porsanger lohká son lea fargga gearggus joatkit akademalaš bargguidisguin.
– Bargagoađán akademalaš bargguidan dakkaviđe go ođđa rektor boahtá sadjái, ja dat lea borgemánu vuosttaš beaivvi rájes, čilge Porsanger.
(Ášši joatkašuvvá gova vuolábealde)
Logje lohká, ahte dat guovttis geat dál gilvaleaba rektorvirggi alde leaba guktot buori evttohasa.
– Mu mielas gal leaba goappašagat hui buori evttohasa. Mun lea guktuide oahpis ja jáhkán guktuid sáhttit doaibmat rektorbarggus, lohká Logje.
Son almmatge ii hálit almmuhit goappá son navdá dahje doaivu šaddat rektorin.
– Stuorra hástalusat
Studeanttaid ovddasteaddji lohká ođđa rektoris olu stuorra hástalusaid. Okta dain lea studeanttaidlohku, mii dál lea vuollin.
Jagis 2014 ledje Sámi allaskuvllas 102 studeantta ja 110 bargi, ja lei dat áidna stáhtalaš allaskuvla Norggas mas leat eambbo bargit go studeanttat.
– Mii leat čoahkkimiin ságastallan das, ahte mo galggašeimmet sáhttit geasuhit eambbo studeanttaid allaskuvlii. Mu sávaldat livččii, ahte dát bargu joatkašuvašii go de ođđa rektor álgá virgái, sávvá Logje.
Moadde ášši berrešii dán oktavuođas árvvoštallat.
– Dássái dát lea leamaš davvesámegiel allaskuvla. Buohkat eai almmatge máhte davvesámegiela, go sápmelaččain leat birrasiid ovcci sámegiela. Dáruiduhttima dihtii leat ollu sápmelačča massán giela, nu ahte sis ii leat vejolaš háhkat oahpu sámegilli. Eai buohkat áiggo šaddat oahpaheaddjin dahje journalistan. Danne berrešii árvvoštallat galggašiigo stuorát válljenmunni oahpuin, árvala Logje.
Son lohká vuogas guorahallat makkár oahpuid olbmot háliidivčče váldit ja makkár oahpuide servodagas lea dárbu.
Mo galggašeigga dat guokte rektorevttohasa láhttet vai du jiena vuoittašeigga?
– Ovttasbargu studeanttaiguin lea dehálaš. Háliidivččen gullat mo háliideaba ovttasbargat studeanttaiguin. Miihan leat dat geaid dihtii allaskuvla oppanassiige lea, vástida Mikkel Rasmus Logje.