– Dat vuhtto. Dáppe lea olu eambbo ealas. Dáppe leat eambbo olbmot, eandalii go kantiidnai manná. Doppe ii leat šat nu guorus go ovdal, lohká studeanta Inger Helene Anti Eira (29).
Nuorra guovdageaidnolaš lea ilus go dál Sámi allaskuvllas leat 270 studeantta, mii lea ođđa olahus.
Son lea goalmmát jagi lohkamin sámegiela, ja boahtte giđa sus galggašii leat mastergráđa.
– Mun in háliidan fárret nu guhkás. Dáppe mus leat fuolkkit ja olbmát (ustibat). Dat lea goit okta ágga manne álgen deike, čilge Eira.
Dát oahput geasuhit
Norgga dutkandáhtaguovddáš dat registrere Norgga allaskuvllaid ja universitehtaid studeantalogu.
Sin dieđut čájehit, ahte Sámi allaskuvlla studeantalohku maŋimuš 22 jagis lea láhtten dego jojo, mannan vulos bajás.
– Mii leat bidjan hirbmat stuorra deattu rekrutteremii iešguđetge dásis, sihke fágaoahpaheaddjit, hálddahus, rektor, direktevra ja earát. Mii leat buohkat bidjan searaid dasa, ahte galgat oidnot, gullot ja maiddái loktet kvalitehta iežamet fálaldagain, čilge rektor Gunvor Guttorm.
Sámi allaskuvlla oahput leat juhkkojuvvon golmma goahtái (ossodahkii): gielladieđagoahti, servvodatdieđagoahti ja duodje- ja oahpaheaddjeoahpuid dieđagoahti.
Duodje- ja oahpaheaddjeoahpuid dieđagoađis leat dán jagi eanemus studeanttat, oktiibuot 132.
Gielladieđagoađis leat 100 studeantta ja servodatdieđagoađis ja 28 studeantta gullet servodatdieđagoahtái.
Rektor lohká skuvllas ain lea olu bargu vai nagadivčče ain boahttevuođas maid geasuhit studeanttaid.
– Go studeanttat vuos bohtet ja álget min oahpuide, de lea hirbmat dehálaš ahte leat duhtavaččat ja sii leat duhtavaččat jus mis leat buorit fálaldagat ja buorre kvalitehta dain fálaldagain mat mis leat. Dien láhkái galggašeimmet doalahit studeanttaid, čilge Guttorm.
Studeanttat miehtá máilmmi
Sámi allaskuvllas lea erenoamáš fálaldat sihke sámi studeanttaide ja studeanttaide geat orrot eará guovlluin eamiálbmotmáilmmis. Dát oahppu lea gohčoduvvon journalistihka mastergráda eamiálbmot perspektiivvas.
Dán oahpus leat dál gávcci studeantta. Okta sis Dát gullá Puruha-álbmogii Ekvadoras (Ecuador).
– Mun lean dáppe Guovdageainnus vai oahpašin mo eamiálbmogat stivrejit dieđihangaskaomiid ja dán láhkái čájehit identitehtaset, ja man dehálaš sin giella ja árbevierut leat, čilge Inti Condo.
Eamiálbmotjournalistihkka ovdána dađistaga ja nu dárbbašuvvojit eambbo ámmátlaš áššedovdit. Sámi allaskuvla lea vuosttážiin máilmmis fállat dákkár oahpu.
Inga Hansen lea dovddus tv-journalista Kalaallit Nunaatas, ja son lea maid Guovdageainnus nannemin gelbbolašvuođas.
– Mun liikon leat Guovdageainnus. Skuvla lea buorre ja ieš gilli lea maid geasuheaddji, lohká Inga Hansen.
– Buorit astoáigefálaldagat ja dat leat nuvttá
Inger Helene Anti Eira válda mielas Ođđasiid fárrui geahččat Diehtosiidda ja Sámi allaskuvlla.
– Skuvllas leat buorit oahaphuslanjat, ja dáppe leat maid máŋga buori astoáigefálaldaga studeanttaide geat háliidit eallit áktiivvalaš eallima, čilge Eira.
Son čájeha midjiide sávnni, gos studeanttat ja earát besset bures vuoiŋŋastit, basadit ja buhtistit rupmaša.
– Mis lea maid sierra drámalatnja, ja dáppe láve rektor doallat jogakurssaid ja dát fálaldat lea áibbas nuvttá. Dáppe láve maid Zumba-dánsun ja datge lea nuvttá, čilge Eira.
– Mu mielas lea buorre go dat ii leat nu stuorra skuvla. Olmmoš dovdá dan, ahte oahpaheaddjis soaitá leat eambbo áigi juohke studentii. Dáppe beasan hupmat iežan eatnigiela. Dat lea hui buorre. Dat goit lea munnje hui dehálaš, deattuha Inger Helene Anti Eira..