NRK Meny
Normal

Studeanta: – Dál skuvla lea eambbo ealas

Sámi allaskuvllas Guovdageainnus leat sihke studeanttat, oahpaheaddjit ja bargit ilus go dál leat skuvllas eambbo studeanttat go goassige ovdal.

Inger Helene Anti Eira

Inger Helene Anti Eira lohká iežas loaktit bures Sámi allaskuvllas. – Dáppe lea buorre oahppobiras, lohká son.

Foto: Dan Robert Larsen / NRK

– Dat vuhtto. Dáppe lea olu eambbo ealas. Dáppe leat eambbo olbmot, eandalii go kantiidnai manná. Doppe ii leat šat nu guorus go ovdal, lohká studeanta Inger Helene Anti Eira (29).

Nuorra guovdageaidnolaš lea ilus go dál Sámi allaskuvllas leat 270 studeantta, mii lea ođđa olahus.

Son lea goalmmát jagi lohkamin sámegiela, ja boahtte giđa sus galggašii leat mastergráđa.

– Mun in háliidan fárret nu guhkás. Dáppe mus leat fuolkkit ja olbmát (ustibat). Dat lea goit okta ágga manne álgen deike, čilge Eira.

Eai goassige ovdal leat leamaš nu olu studeanttat Sámi allaskuvllas go dál.

GEAHČA VIDEO: Dás sáhtát geahččat tv-ášši mii sáddejuvvui Ođđasiin duorastaga golggotmánu 26. beaivve 2017.

Dát oahput geasuhit

Norgga dutkandáhtaguovddáš dat registrere Norgga allaskuvllaid ja universitehtaid studeantalogu.

Sin dieđut čájehit, ahte Sámi allaskuvlla studeantalohku maŋimuš 22 jagis lea láhtten dego jojo, mannan vulos bajás.

Sámi allaskuvlla studeantalohku

Dás oainnát Sámi allaskuvlla studeantaloguid jagi 1995 rájes. Oahppiidlohku lei unnimus jagis 2010: 105. Nubbin eanemus studeanttat ledje jagis 2002: 269.

Foto: Sámi allaskuvla

– Mii leat bidjan hirbmat stuorra deattu rekrutteremii iešguđetge dásis, sihke fágaoahpaheaddjit, hálddahus, rektor, direktevra ja earát. Mii leat buohkat bidjan searaid dasa, ahte galgat oidnot, gullot ja maiddái loktet kvalitehta iežamet fálaldagain, čilge rektor Gunvor Guttorm.

Gunvor Guttorm

Rektor Gunvor Guttorm mojohallá go Sámi allaskuvla dál lea geasuhišgoahtán eambbo studeanttaid.

Foto: Dan Robert Larsen / NRK

Sámi allaskuvlla oahput leat juhkkojuvvon golmma goahtái (ossodahkii): gielladieđagoahti, servvodatdieđagoahti ja duodje- ja oahpaheaddjeoahpuid dieđagoahti.

Duodje- ja oahpaheaddjeoahpuid dieđagoađis leat dán jagi eanemus studeanttat, oktiibuot 132.

Gielladieđagoađis leat 100 studeantta ja servodatdieđagoađis ja 28 studeantta gullet servodatdieđagoahtái.

Rektor lohká skuvllas ain lea olu bargu vai nagadivčče ain boahttevuođas maid geasuhit studeanttaid.

– Go studeanttat vuos bohtet ja álget min oahpuide, de lea hirbmat dehálaš ahte leat duhtavaččat ja sii leat duhtavaččat jus mis leat buorit fálaldagat ja buorre kvalitehta dain fálaldagain mat mis leat. Dien láhkái galggašeimmet doalahit studeanttaid, čilge Guttorm.

Studeanttat miehtá máilmmi

Sámi allaskuvllas lea erenoamáš fálaldat sihke sámi studeanttaide ja studeanttaide geat orrot eará guovlluin eamiálbmotmáilmmis. Dát oahppu lea gohčoduvvon journalistihka mastergráda eamiálbmot perspektiivvas.

Dán oahpus leat dál gávcci studeantta. Okta sis Dát gullá Puruha-álbmogii Ekvadoras (Ecuador).

– Mun lean dáppe Guovdageainnus vai oahpašin mo eamiálbmogat stivrejit dieđihangaskaomiid ja dán láhkái čájehit identitehtaset, ja man dehálaš sin giella ja árbevierut leat, čilge Inti Condo.

Inti Condo

Inti Condo lea guhkás johtán vai oahpašii mo šaddat buoret journalistan.

Foto: Samuel Frode Grønmo / NRK

Eamiálbmotjournalistihkka ovdána dađistaga ja nu dárbbašuvvojit eambbo ámmátlaš áššedovdit. Sámi allaskuvla lea vuosttážiin máilmmis fállat dákkár oahpu.

Inga Hansen lea dovddus tv-journalista Kalaallit Nunaatas, ja son lea maid Guovdageainnus nannemin gelbbolašvuođas.

– Mun liikon leat Guovdageainnus. Skuvla lea buorre ja ieš gilli lea maid geasuheaddji, lohká Inga Hansen.

Inga Hansen

Inuihtta journalista Inga Hansen ii gáđa ii veahášge go Sámi allaskuvllas lea lohkagoahtán journalistihka.

Foto: Samuel Frode Grønmo / NRK

– Buorit astoáigefálaldagat ja dat leat nuvttá

Inger Helene Anti Eira válda mielas Ođđasiid fárrui geahččat Diehtosiidda ja Sámi allaskuvlla.

– Skuvllas leat buorit oahaphuslanjat, ja dáppe leat maid máŋga buori astoáigefálaldaga studeanttaide geat háliidit eallit áktiivvalaš eallima, čilge Eira.

Son čájeha midjiide sávnni, gos studeanttat ja earát besset bures vuoiŋŋastit, basadit ja buhtistit rupmaša.

– Mis lea maid sierra drámalatnja, ja dáppe láve rektor doallat jogakurssaid ja dát fálaldat lea áibbas nuvttá. Dáppe láve maid Zumba-dánsun ja datge lea nuvttá, čilge Eira.

Inger Helene Anti Eira

Sierra lanjažis Sámi allaskuvlla kealláris leat máŋga ođđaáigásaš gievrudahttináđa. – Midjiide studeanttaide lea hirbmat buorre go dátge fálaldat lea áibbas nuvttá.

Foto: Dan Robert Larsen / NRK

– Mu mielas lea buorre go dat ii leat nu stuorra skuvla. Olmmoš dovdá dan, ahte oahpaheaddjis soaitá leat eambbo áigi juohke studentii. Dáppe beasan hupmat iežan eatnigiela. Dat lea hui buorre. Dat goit lea munnje hui dehálaš, deattuha Inger Helene Anti Eira..