Stállu boahtá, boađát go don maid?

Livččet go son vuollánan ja ávvudan juovllaid skeaŋkkaid haga jus stállu livččii suoládan du juovlaskeaŋkkaid?

– Nu eai daga gal Mánáid-tv Stálugilvvuid roastilis mánát, čilge NRK Mánáid prošeaktajođiheaddji Anne Kristine Rikardsen.

Son sávvá buohkaide bures boahtin geahččat Stálugilvvuid Studio Sámis Kárášjogas maŋŋebárgga skábmamánu 8. beaivvi dii. 18.00.

Mánát geat oassálastet Stálugilvvuid prográmmas ohcet stálu ja hástalit su gilvui.

– Fidnen dihtii skeaŋkkaid ruovttoluotta, de fertejit vuoitit gilvvuid. Jos vuoittáhallet, de šaddet stálu biigot ja reŋgot agibeaivvi, čilge Rikardsen.

Ja lasihastá:

– Mii leat vuordimin káfiin, váffeliiguin ja sáfttain go dii rukses ránu mielde boahtibehtet sisa.

15 prográmma

– Čájáhusprográmmas gilvaleaba Guovdageainnu máná guovttos, muitala Rikardsen.

Stálugilvvut leat NRK Sámi Mánáid-tv gilvoprográmma, mii lea ráhkaduvvon 7-12–jahkásaš mánáid várás.

– 15 prográmmas oaidnit 30 máná gilvaleamen ja sii bohtet Vuotnabađas, Unjárggas, Ohcejogas, Gáregasnjárggas, Kárášjogas, Guovdageainnus, Mázes, Álttás, Gárasavvonis, Čohkkirasas, Tromssas ja Sálliris, muitala Rikardsen.

Stálugilvvuid oainnát skábmamánu 30. beaivvi rájes NRK Superis.

Beasat oahpásmuvvat Binnabánnažiin

Árabuš seamma beaivvi beasat maid oahpásmuvvat Binnabánnažiin.

– Son lea sámegielat vávvá, guhte lea hui diehtoáŋgir ja virkui. Son lea hui buorremielalaš ja son liiko smiehtadit, muitala Rikardsen.

Binnabánnažis lea maiddái hui buorre ustit, Ujujju, geainna ovttastallá olu. Ja dieđátgo maid? Binnabánnaš maid máhttá dovdnet, mánáid luđiid juoigat.

Rikardsen muitala ahte lagabui 100 mánáidgárdemáná leat vuordimis maŋŋebárgga skábmamánu 8. beaivvi dii. 1000 ja 1100 Mánáid-tv Binnabánnašdoaluide. Mánát besset geahččat Binnabánnaš-prográmmaid ja dearvvahit unnimusaid ođđa tv-ustiba, Binnabánnaža.

Jávohis guollevávvá buoremus usti

Binnabánnaš lea maid buorremielalaš ja son liiko jurddašallat. Su buoremus ustit lea jávohis guollevávvá mainna gulahallá. Go Binnabánnaš lea buorremielas dahje váivvis, de son láve dovdnet. Dovdnen lea unna luođáš, mii lea heivehuvvon ja álkiduvvon mánáid várás.

Rickardsen muitala ahte Binnabánnaš prográmma sisdoallu lea heivehuvvon buot nuoramusaide.

– Mánáid TV áigumuš lea nannet sámi mánáid kulturgullevašvuođa, mánáid vuosttaš giellaoččodeami ja ealáskahttit sámi luohtevieruid nu go dovdnema, čilge Rikardsen.