NRK Meny
Normal

Son lea čállán Davve-Norgga diimmá buoremus girjji

Sigbjørn Skåden vuittii girjjiinis «Våke over dem som sover» Havmann bálkkašumi.

Sigbjørn Skåden

Sigbjørn Skåden lea bajásšaddan Skániin Mátta-Romssas.

Foto: Anne Olli / Nrk

Nu šattaige diimmá Davve-Norgga buoremus girjin.

Bálkkašupmi mielddisbuktá gudni lassin 50.000 ruvnnu, ja dat juhkkojuvvo Raanes Nordlanddas geassemánu guđát beaivve.

Våke over dem som sover

«Våke over dem som sover» lea Sigbjørn Skådena vuosttaš romána dárogillii.

Foto: Pressebilde / Cappelen Damm

«Våke over dem som sover» almmuhii Sigbjørn Skåden Cappelen Damm lágádusa bokte diibmá.

Girjjis čuovvut nuorra, sápmelaš dáiddára Amund Andersena. Son mátkošta Guovdageidnui bargat iežas čájáhusa váldobargguin. Son orro dego viivvuheamit váccaseamen gilážis moadde vahku, seammás de oidnogoahtá veahážiid mielde dat mii lea su váldobargu.

Dát dáiddalaš bargu doalvu lohkki čiekŋaleappot seavdnjadassii.

Muhtimiin muitalus sirdašuvvá maŋos áigái, ja dan áigái goas Amund Andersena máttaráhkku, áddjá ja eatni ásse sámi gilážiin Skániin Mátta-Romssas.

Románas leat fáddán fápmostruktuvrrat, seksualitehta ja nuppástusat sámi servodagas dan moadde maŋimuš jahkečuođis.