Niillas Somby muittaša mo su unnavielljaš balai juovlastálus. Illa duostai viežžat juovlaskeaŋkkaid maid juovlastállu rokkaid seahkas.
Dál son báhtar juovlahuššas
Niillas Somby ii loga iežas čuovvut makkárge juovlavieruid, iežas muitala báhtarit juovlahuššas. Son vuolgá eret guovllus gos juovllaid ávvudit, ja go dan guovllus álget juovllaide ráhkkanit gos son ain lea, de báhtara son doppe ges eret. Juovladeaivvademiid ja ávvudemiid atná son "hysterijan".
Váillaha dološ sámi vieruid
Niillas Somby lohká iežas garvit juovladoaluid, danne go oaivvilda kolonisttat leat duvdilan eret sámiid ávvubottu, mii ii lean Jesus riegádeapmi, muhto áigejorggiheapmi, mii lei hui dehálaš boddu. Ja dál kolonisttat leat maid molsun sámiid eallinoainnu ja oskku. Stuorraservodat lea váldán sámiin eret sámiid identitehta, lohká Somby.
Atná jállodahkan ávvudit kolonisttaid oskku
Dát kolonisttat leat rievdadan sámiid eallima ja oskku. Niillas Somby atná danne unohassan ahte sámit ávvudit kolonisttaid boasttuvuođaid. Iežas lohká sávvat ahte ammal juo moatti buolvva geažis fuomášit sámit dáid boasttuvuođaid, maid kolonisttat leat dahkan.
Dál leat gal dieđos dat kristtalaš juovllat gal jávkamin, muhto de leages dat gávpealbmát fuomášan ahte dáid áiggiid jođihit gálvvuid, maid muđuid eai jođit.