Son čierui go gulai čáppa jienaid

Davvi-Norgga riemuin guoimmuhii Sámi Jienat koarra olbmuid luđiiguin. Luođit guoskkahedje su dovdduid, lohká okta gii finai dán konsearttas.

Jouke Smith

Joke Smit

Foto: Arne Ivar Johnsen / NRK

Harštak gávpoga kulturvissui ledje ollugat boahtán guldalit ja oaidnit Sámi Jienat koara Davvi-Norgga riemuid oktavuođas mat lágiduvvojit Harštak gávpogis gitta lávvardahkii. Okta gii lei Sámi Jienat koara konsearttas Harštak gávpogis lei Joke Smit gii lea eret ja ássá Hollánddas.

Sámi Jienat

Sámi Jienat

Foto: Arne Ivar Johnsen / NRK

Son lohká ahte dan botta go gulai Sámi Jienat koara juoigamin daid guokte vuosttaš luđiid de son dovddai mo gatnjalat golge muođuid miel ja go háleštetne de son muitala fas dovdat mo luođit váikkuhit dovdduide. Joke muitala mearkkašan mo nissonolbmot geavahedje njuni erenoamáš láhkai go juige ja son dego oaidná daid viiddis duoddariid sámis maid luohti iežas láhkai vel báidná.

Luođit gokče sámi oalle viidát

Rita Saijets ássá Harštak gávpogis gos son lea orrun 16 jagi. Ovdal go dohko fárrii de son ásai Kárášjogas. Rita lohká ahte lei suohtas vásihit dán konseartta go luođit gokče sámi oalle viidát. Ledje ollugat geat ledje geahččamin ja guldaleamen Sámi Jienat koara ja Rita lohká ahte sivvan dasa sáhttá leat ahte olbmot, geat ásset eará guovllus, bohtet ruovttu guvlui eddo dan vahkkus go Davvi-Norgga riemut lágiduvvojit.

Koarralávlun addá sutnje ollu

Nilo Vuomajoki

Niilo Vuomajoki

Foto: Arne Ivar Johnsen / NRK

2003:a rájes lea ovddeš Yle Sámi Radio bargi Niilo Vuomajoki lávlun ja juoigan Sámi Jienat koaras. Koarralávluma bokte lohká vásihit lagaš oktavuođa olbmuiguin ja dat buktá sutnje erenoamáš dovddu. Niilo ássá Ohcejogas ja lohká ahte doppe gal livčče leat váddásat juoigat go ovdamearkka dihti dáppe Harštak gávpogis. Stuorát gávpogis eai olbmot dieđe su heittot ja buriid beliid birra nugo olbmot ruovttuguovllus dihtet, lohká Ohcejohkalaš Niilo Vuomajoki.