Hopp til innhold

Solidaritehta eará eamiálbmogiidda

Norgga Sámiid Riikkasearvvi (NSR) jođiheaddji ohcala sámiid gaskkas eambbo solidaritehta eará eamiálbmogiidda.

Mayafamilie utenfor midlertidig brakke i Panabaj.

Čájáhusgovva Maya-bearrašis.

Foto: Mette Ballovara / NRK

– Solidaritehta eará eamiálbmogiidda ii galgga leat dušše ovttaskasolbmuid duohken. Mun váillahan konkrehta njuolggadusaid ja vuoruheamiid vai eará eamiálbmogiid veahkeheapmi ii livčče nu soaittáhagas, lohká NSR-jođiheaddji Aili Keskitalo.

Keskitalo lohká sámi solidaritehtabarggu menddo dávjá báhcit ovttaskasolbmuid duohkai.

– Nu ii berrešii leat. Dat berrešii leat sajáiduvvon min organisašuvnnaid siskkobealde ja min ásahusaid siskkobealde. Hui dehálaš lávki midjiide lea dáhkidit, ahte dát bargu ii bázašivčče dušše ovttaskasolbmuid duohkai, deattuha Kestikalo.

– Olu sáhka solidaritehtas

Aili Keskitalo

Aili Keskitalo (NSR).

Foto: Dan Robert Larsen / NRK

Eamiálbmogiin ja ovdánahttimis háleštit dáid beivviid Romssa universitehta sámi dutkamiidguovddáža konferánssas. Iige leat hárve sátni «solidaritehta» gullo dákkár oktavuođain.

Menddo dávjá orro sápmelaččaid solidaritehta eará eamiálbmogiidda báhcimin goittotge sániid dássái.

Dan dáhtošii NSRa jođiheaddji ja párlamentáralaš jođiheaddji, Aili Keskitalo, rievdadit.

– Jurddašan eambbo dan ahte Sámedikkis galggašii dakkár hui nana politihkka das mo bargat. Fertet dárkilit jurddašit ja digaštallat mo vuoruhit dan gaskariikalaš barggu, lohká Keskitalo.


Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.