Dát dálkudiddjekontåvrrå soajttá hiejteduvvá

– Ållu bágoj dagi sjattav. Dáv ep dåhkkida, javllá smávvamánáj ieddne.

Nav gåk NRK dádjat de la guoradallama vuolen árvustallat man ålov Divtasvuona suohkan lulu siesstet jus stieggiji dálkudiddjekontåvråv Ájluovtan Divtasvuonan.

Valla suohkanoajvve Tor Asgeir Johansen nádu dákkir guoradallam la tjadáduvvam.

– Iv la mån sierralágásj guoradallam vuojnnám, danen nádudav. Budsjehtan tjuodtju man ålov máksá Ájluovta dálkudiddjekontåvråv jådedit. Danen ij la sierra guoradallam tjadáduvvam.

Gártjes ruhtadille

Divtasvuona suohkan la Robek-låhkusin ja gártjes ruhtadille la, nav gåk NRK dádjat, sivva manen dákkir guoradallam la tjadáduvvam.

• Lågå aj: Derfor er det økonomisk krise i Tysfjord

Suohkan viertti siesstet måttijt millijåvnåjt jáhkaj, diedet suohkanoajvve, ja ij náduda fálaldahka suohkana dálkudiddjekontåvråvj soajttá binneduvvá.

– Soajttá dát dáhpáduvvá, iv dav máhte nádudit. Dáv hæhttup maŋenagi árvustallat. Tjaktjaj galggap vælggogis plánav dahkat.

Dokumenta tjiegaduvvi

NRK ij la oadtjum låhkåt Ájluovta dálkudiddjekontåvrå guoradallamav mij la tjadáduvvam gå dat la sissŋálasj barggotjálos budsjehta ja ekonomijabargon, tjállá Divtasvuona suohkana varresvuoda- ja huksooajvve Lill Tove Hansen e-påstan NRKaj.

Ij dåhkkida

Ja smávvamánáj ieddne Renate Paulsen ij Ájluovta dálkudiddjekontåvrå hiejttemav dåhkkida.

– Ållu bágoj dagi sjattav. Dát ij dåhkki. Ållu vájvve la jus hæhttup 90 minuhta færjo maŋen mannat gå dálkudiddje lusi galggap. Máhtti farra ietjá dåjmajt hiejttet masi ij la dárbbo.

Sissel Mikkelsen, gut aj la smávvamánáj ieddne javllá suohkan farra bierri vijdedit fálaldagáv, ja ietjá dåjmajt hiejtedit.

– Iesj lav dálkudiddje lunna manádam, ja ållu alvaduváv gå muhttijn li dåssju gallegattja bargon dálkudiddjekontåvrån Ájluovtan.

Jagen 2011 Divtasvuona suohkan ådåstuhtij Ájluovta dálkudiddjekontåvråv vargga milijåvnåjn gå kontåvrrå sirdeduváj Hábmeris Ájluoktaj.