Dán váhko l Julevsáme vahkko Hábmerin. Ja vahkkoloaben de HellmoCup ásaduvvá Måsken Hábmerin
Dijmma ettjin besa dav vargga 50 jahkásasj árbbedábálasj dahpádusáv ásadittjat; ulmutjijt tjoahkkitjit bállov tjievtjatjit ja aktan hávskkudalátjit.
Valla dán jage de lij mierredam cupav ásadit juska ballo korona hæhkkat suohkanin njåmmmu, jali jus rássjodálkijn boahtá.
– Ulmutja riek ávvudalli gå de vat máhttep tjåhkanit, ja sij gudi årru dánna Måsken riek ávvudalli, javllá Stina Johnsen guhti l Hellmocupa jådediddje.
Hiejtedit
Da la Doajmmasiebrre Julevsábme (DSJ) mij dáv cupav Måsken Hábmerin ásat. Stina Johnsen la tjielgas jus korona hæhkkat cupa åvddåla, jali cupa bále, suohkanin njoammogoahtá, jali jus vastes dálkev dahká. De vierttiji dalá ásadimijt hiejtedit.
– Mån lav suohkana bajeltdálkudiddjijn ságastam gåktu dáv gárvedit ja gåktu dahkat. Jus koronadille hæhkkat ietjájduvvá, de cupa dalá hiejteduvvá. Ja jus rássjodálkev buktá, de vierttip cupav hiejtedit, javllá Johnsen.
Johnsen tjielggi sivá dasi le gå dán jagásj cupa vuodon la divna ásadime tjadáduvvi jus dåhkki ålggon liehket.
– Mij lip dal riek gárvvása vájk makkár dille sjaddá, ja vájnnodip ulmutjit aj liehket gárvvása ja aj njoammomnjuolgadusájt tjuovvot.
Vierttihi várrogisá liehket
Johnsen subtsas plánim lij dán jagásj cupav gånnå njoammomsuodjalus la ájnnasamos.
Juska ålos båhti Måsskåj dajt biejvijt, de jáhkká Johnsen dát buoragit galggá mannat.
– Mij lip koronadile diehti ietjá lahkáj hæhttum ájádallat dagu gåktu ulmusjfuovav stivrrit gå de galggi dagu biebmojt oasstet ja bårråt, ja gånnå bessi tjåhkudallat kámpajt gehtjatjit. Nav de jáhkáv dát galggá buoragit mannat jus dal ulmutja ietja lij várrogisá.
Moadda ietjá dåjma
Álggo cupan lej 1972, ja cupa l vargga juohkka jage ásaduvvam. Dijmma ettjin besa korona diehti.
– Dán jage vuojnnet la rekord galla juohkusa ålmmåj gaskan båhti tjievtjatit, javllá Stina Johnsen.
Johnsen doajvvu ienep nissunjuohkusa båhti oassálastátjit, ja mujttádahttá Hellmocupa ij la ájnna ásadus Måsken dan vahko.
– Duodden cupaj ásaduvvá aj bállotjiektjamskåvllå biejvet cupa åvddåla guhti de Erik Anders Sæter jådet. Ja de la aj adnosjaddoåhtsåm Måsken dijstagá dan sæmmi vahko, ja de dájvvim duorastagá. Guokta riek geldulasj dahpádusá. Duodden aj subtsastumbåddå mánájda ja nuorajda duorastagá, duoddi Johnsen.
Máná ja nuora aj bessi tjievtjatijt sierra juohkusin. Ja gå la badjelasj 14 jage, de besa stuoragij siegen tjiektjat.
– Stuoragij cupa álggá bierjjedagá. Ja lávvodakiehkeda la de finálla, hæjttá rahtjalis, valla huoman loajtos Stina Johnsen.
Duodden li aj mánáj- ja nuorajkámpa.