NRK Meny
Normal

Čuokkis gáhtte eamiálbmotdáidaga

Čuoggát mat leat nu unnit, ahte daid ii oainne čalmmiiguin, galggašedje dál gáhttet Australia eamiálbmogiid dáidagiid ja dáiddalaš bargguid.

Fitnodat čilge dás mo dihtorčuoggát doibmet.
Foto: Nils Egil Gaup / NRK

Australia eamiálbmogat aborigiinnat leat guhká gillán dainna go ovttaskasolbmot ja stuorra fitnodagat suoládit ja ávkkástallet sin dáidaga. Dál leatge váldán atnui ođđaseammos teknologiija vai galggašii leat vejolaš álkibut čalmmustahttit daid geat vuvdet dáiddalaš áddestallamiid.

Mikroskohpalaš dihtorčuoggát

IdenteArt lea namma industriijafitnodagas mii lea ráhkadan dan ođđa diŋgga mii dál galggašii suddjet eamiálbmogiid vuoiŋŋaduoji. Unna binna bánna mikroskohpalaš čuoggáide leat vurkejuvvon dieđut dáiddára, galleriija dahje dáiddaguovddáža birra gos dáiddabargu lea ráhkaduvvon. Dieđut vurkejuvvojit našonála dihtorvuorkái man federála ráđđehus ruhtada. Eamiálbmot dáiddafitnodagat ja ovttaskasdáiddárat miehtá Australia dat oamastit ossosiid industriijafitnodagas.

Gáhtten ja bargosajit

Australia Northern Territory ráđđehusa ovddeš ministtar, Peter Toyne, lohká ođđa hutkosa mearkkašit olu sihke eamiálbmotdáidagii ja eamiálbmogiid báikegottiide. - Industriija lea dáinna vugiin hutkan čovdosa stuorra váttisvuhtii mii lea miehtá eamiálbmotmáilmmi ja lea maid ásahan ođđa bargosajiid eamiálbmogiidda, lohká Toyne ABC Online neahttasiidui. Dál leat IdenteArt fitnodagas 125 bargi, ja eanaš dáin leat boaittobeale guovlluin. 12.000 eamiálbmotdáidagii leat dán áigái bidjamin dan ođđa hutkamuša.