Skuvllas galggaše oahpahit bivdit

Norgga bivdo- ja guolástansearvi háliida vuođđoskuvllaoahppit ožžot vejolašvuođa čađahit bivdogeahččaleami skuvlaáiggis. Muhto Guovdageainnus leat juo čađahan dáid geahččalemiid 1986:a rájes.

rifle og sekk

Nuorat galggaše skuvllas beassat oahppat bivddu birra, nu oaivvilda Norgga bivdo- ja guolástansearvi.

Foto: Johan Ánte Utsi / NRK
Journalist

Guovdageainnu nuoraidskuvllas lea dát leamaš válljenfága máŋgalot jagi, ja Anton Dahl lea beassan oahpahit nuoraid bivddu birra.

Mus leat leamaš oahppit dán fágas juohke jagi, ja lea logát luohkká mii beassá čađahit dán fága, čilge Dahl.

Oahpahit mánáid bivddu birra

Lea Norgga bivdo- ja guolástansearvi Romssas mii lea evttohan ahte bivdogeahččaleamit galggaše šaddat válljenfága buot vuođđoskuvllain.

– Leat olu ákkat manne dan bargat, earret eará dan ahte oažžut mánáid olgoáimmu ovdii. Oahpahit sin bivddu ja guolásteami birra. Go ovdalaš áigge sáhtii áhčči oahpahit movt galgá bivdit, muhto dál gáibiduvvo ahte leat oahpahuvvon instruktevrat mat galget oahpihit nuoraid. Ja dát lea hui dehálaš sihkarvuođa ektui, go vearjjuid birra galgá oahppat, čilge Ann-Eva Isaksen, gii jođiha Romssa bivdo- ja guolástansearvvi.

Anton Dahl

Anton Dahl lea Guovdageainnu nuoraidskuvllas oahpahan nuoraid measta 30 jagi bivddu birra.

Foto: Kjell Are Guttorm / NRK Sami Radio

Unnán meahcis

Anton Dahl gal oaivvilda ahte dá lea hirbmat buorre fálaldat nuoraide, go dán áigge eai šatta nu dávjá šat fitnat meahcis.

– Mun oainnán ahte buot logát luohkká-oahppit leat válljen min meahcástanfága, gos galget maiddái čađahit bivdogeahččaleami. Ná de besset bivdiregistarii, čilge Dahl.

Logut čájehit ahte Guovdageainnus leat ge eanemus ealgabivdit olles Norggas. Ja Dahl ii eahpit ahte dá sáhttá leat váikkuhus das go mánát besset oahppat bivddu birra skuvllas.

– Dat sáhttá leat okta dehálaš oassi, mis leat olu nuorra bivdit goit. Ja dat mii maid lea hui somá lea go nieiddat maid beroštit bivddus. Mus leat seammá olu nieiddat dán oahpahusas go bártnit, loahpaha Dahl.

Guldal ášši: