NRK Meny
Normal

Buoret vejolašvuohta ovttasbargat rájáid rastá

– Sirpmá ja Ohcejohnjálmmi skuvllaid ovttasbargu sáhttá šaddat bistevaččain jus Norga, Suopma ja Ruoŧŧa dohkkehit Davviriikalaš samekonvenšuvnna, doaivu sámediggeráđđi Inger Eline Eriksen.

Ohcejohtnjálmmi skuvla- ja Sirpmá skuvla oahpahus

OKTASAŠ OAHPAHUS: Sirpmá ja Ohcejoga mánáin lea leamaš 2005 rájes oktasaš oahpahus guokte beaivve vahkus.

Foto: Harry Johansen

Inger Eline Eriksen studerer Nordisk samekonvensjon

OHCAGOAHTÁ ČOVDOSIID: – Jus Norga, Suopma ja Ruoŧŧa vuolláičállet davviriikkalaš sámekovenšuvnna, de eai leat čovdosat das dalán ahte mo nannet rádjerasttideaddji ovttasbarggu. Daid fertet hábmet ovddos guvlui, dadjá sámediggeráđđi Inger Eline Eriksen.

Foto: Harry Johansen

Sápmelaččaide galgá šaddat álkit bargat ovttas riikkarájáid rastá ovddidan dihtii sámi giela, kultuvrra, ealáhusaid ja servvodagaid.

Dat lea navdimis váldoulbmil Davviriikalaš sámekonvenšuvnnain maid Norga, Suopma ja Ruoŧŧa vuordimis vuolláičállet lagamuš áiggis.

– Jus stáhtat vuolláičállet soahpamuša, de šaddá vejolašvuohta ásahit oktasaš oahpahusa maid eará rádjaguovlluin, ovdamearkka dihtii Kárášjoga ja Gáregasnjárgga sámemánáid várás, árvvoštallá Eriksen.

Stáhtačálli Anne Karin Olli duođašta stáhtaid buorre muddui leat boahtán ovttaoaivilii šiehtadallančoahkkimis mii skápmamánus lágiduvvui Roavvenjárggas.

– Bealálaččat leat dál dárkkisteamen konvenšuvnna teavstta vai ieš guđet riikkaid giellageavaheapmi šaddá ovttalágan. Dasto galgá sohppojuvvon konvenšuvdnateaksta dohkkehuvvot ja almmuhuvvot, čilge Olli.

Son ii vuos dál hálit dadjat maidige das ahte goas stáhtat čállet vuollái konvenšuvnna.

Stuorra vuordámušat

Sierra ekspeartajoavku dat lea juo 2005as árvalan Norgga, Suoma ja Ruoŧa ásahit davvirikkalaš sámekonvenšuvnna mii galgá álggahit proseassa jávkadit daid áššiid mat odne hehttejit rádjerasttideaddji ovttasbarggu.

Sámediggeráđđi Inger Eline Eriksen šálloša go lea gollan badjel logi jagi ovdal go mearrádus dahkku.

Muhto sus lea stuorra vuordámušat konvenšuvdnii.

– Jus ekspearttajoavkku árvalus dohkkehuvvo, de Norga, Suopma ja Ruoŧŧa leat geatnegahtton ásahit oktasaš lágaid mat álkidahttet sápmelaččaid bargat riikkarájáid rástá iesguđet surggiid oktavuođas, ja ná nannet sámegiela, kultuvra, ealáhusaid ja servvodateallima, Eriksen čilge.

Ovttasbargu sáhttá ovdamearkka dihtii dáhpáhuvvut oahpahusa, dearvvašvuođa, ealáhusaid ja čálgoortnegiid oktavuođas.

Sirbmá ja Ohcejohka buorre ovdamearkan

Nillá Tapiola čájeha skuvlagirjjiid

ÁVKKÁSTALLET SÁMI GIRJJIIN: Suoma historjjá girjjit eai heive Norgga beale ohppiide. Lihkus Norgga bealde gávdnojit sierra sámi historjágirjjit mat heivejit buot sámi mánáid várás, čilge Ohcejohnjálmmi oahpaheaddji Nillá Tapiola.

Foto: Harry Johansen

Sirpmá ja Ohcejohnjálmmi skuvllaid ovttasbargu namahuvvo de go buorre ovdamearkan dasa ahte mo rádjerasttideaddji ovttasbargu sáhttá nannet sámi giela, kultuvra ja servodaga.

Skuvllat leaba 2005 rájes lágidan oktasaš oahpahusa guokte beaivve vahkus.

– Dákkár barggu sáhttá ovttas doaimmahit jus beare dáhttu ja hállu gávdno, lohká Ohcejohnjálmmi oahpaheaddji Nillá Tapiola.

Hehttehusat galget eret

Dattege riikkaid dálá iešguđet lágat sáhttet leat maid hehttehussan rádjerasttideaddji ovttasbargui. Suomas ja Norggas leat ovdamearkka dihtii iešguđetlágan oahppoplánat ja oahppogirjjit:

– Oahppogirjjit leat dávjá ráhkaduvvon iešguđet riikka oahppoplána mielde. Danin leat ferten guorahallat ja heivehallat girjjiid maid geavahat, nu ahte dat heivejit guktui beale oahppolánaide, čilge Tapiola.

Skuvlabusse Sirpmás Ohcejohkii

RASTTILDIT RIIKKARÁJÁ: Sirpmá ja Ohcejohnjálmmi skuvlamánát mátkkoštit vuorroláhkái skuvlabussiin. Nuppi beaivvi Sirpmá oahppit johtet Ohcejohkii, nuppi beaivvi ges Ohcejoga mánát Sirbmái.

Foto: Harry Johansen

Ovttasbargu lea dasa lassin maid guozahuvvon go Deanu gieldda politihkkárat guhkit áiggi leat áitán heaittihit Sirpmá skuvla ja sirdit mánáid Deanu sámeskuvlii Deanu šaldái.

Jus Davviriikalaš konvenšuvdna vuolláičállo, de sámediggeráđđi Inger Eline Eriksen doaivu Sirpmá ja Ohcejoga ovttasbarggu šaddat bistevaččain.