NRK Meny
Normal

Skohtervuoddji: - Heaggaváralaš geaidnu

Kárášjogas lea váralaš jiekŋageaidnu mii manná rastá joga, oaivvilda skohtervuoddji. Geaidnu lea boltojuvvon nu ahte leat mehterallosaš skálvvit goappáge bealde.

Dálveluodda

Dá lea luodda, Muotkenjárgga buohta Kárášjogas.

Foto: Nils Johan Eira / NRK

Joga nalde Muotkenjárgga buohta Kárášjogas, dat manná geaidnu rastá joga.

Beaivečuovggas gal vel fuobmá mehter čiekŋalis gura, seavdnjadin lea eará ášši.

– Dát lea heaggaváralaš, lohká Idar Nilsen gii dávjá vuodjá skuhterin joga mielde gos lea boltojuvvon geaidnu.

Čorge alcces geainnu

Kárášjoga boanda, Torgeir Nordsletta, lea fargga guoktelot jagi čorgen alcces geainnu rastá joga dannego sus lea eanadoallu goappašiid bealde joga.

Su dálvegeaidnu rasttilda skohterluotta.

Torgeir Nordsletta

Boanda Torgeir Nordsletta gal mieđiha merkegoahtit luotta.

Foto: Mathis S. Wilhelmsen / NRK

– Mu mielas ii leat geaidnu váralaš jus fal eai vuoje beare leahtuin, muhto merket sáhttá jus fal oktage siđaš, lohká Nordsletta.

Torgeir Nordsletta lea boanda ja son dat boaltu geainnu rastá joga vai sáhttá tráktoriin suoidnespáppaid viežžat nuppe beal joga.

Su ovddasvástádus gii boaltu

Trygve Nilsen

Láhtut galget leat nu movt gielda lea bidjan, lohka Nilsen.

Foto: Mathis S. Wilhelmsen / NRK

Kárášjoga gieldda jođiheaddji Trygve Nilsen lohká dat lea su ovddasvástádus merket geainnu gii boaltu joga, vai olbmot eai bártit.

– Láhtut galget leat nu movt gielda lea bidjan, muhto dat lea dan ovddasvástádus gii boaltu ahte váruha ahte eai šatta várálašvuođat, lohká Nilsen.

Muhto Nilsen ii dieđe man láhkai galgá merket go ii leat fitnan geahččamin guovllu.

Vearrámus lea jus manná olbmoheagga

Idar Nielsen lohká dákko vudjet ollu olbmot skohteriiguin mat eai dieđe ahte geaidnu lea bolton rastá joga.

Skohtervuoddji

– Dát lea heaggaváralaš, lohká Idar Nilsen.

Foto: Kai Emil Berg / NRK

Vearrámus mii sáhttá geavat lea jus manná olbmoheagga, ja dalle lea maŋŋit álgit divvut, lohká Nilsen.

Dálvegeaidnu rasttilda skohterluotta ja lea váralaš skohtervuddjiide, oaivvilda Idar Nilsen.

Bolton luotta 1980 rájes

Boanda Torgeir Nordsletta gal mieđiha merkegoahtit geainnu, vaikko dán rádjái ii leat leamaš dárbu.

– Dát geaidnu lea boltojuvvon 1980 rájes, ja eai leat leamaš váttisvuođat, čilge Nordsletta.

Muhto Nordsletta ipmirda manne dán áiggi soaitá deháleappo merket geainnuid, go dán áiggi lea skohteriin eambbo leahttu.

Geahča tv-ášši das:

Várálašgeaidnu