NRK Meny
Normal

Skániid suohkan áiggošii sámi suohkanin

Skániid suohkan lea dál iskame movt livččii searvat sámi giellahálddašanguvlui. Skániid sátnejođiheaddji Helene Berg Nilsen lohká iežaset bargamin dál áššiin.

Aili Keskitalo og ordfører i Skånland

Sámediggepresideanta čoahkkinasttii dálvet Skániid suohkaniin gos muitalii eanet sámi giellahálddašanguovllu birra ja sávai suohkanii bures boahtima dohko. Dá lea sámediggepresideanta ovttas Skániid sátnejođiheddjiin Helene Berg Nilseniin.

Foto: Mathis Eira

– 2010:s dahkkui guorahallan maid Skániid ja Evenášši suohkanat ledje dáhtton. Dán sáhttit geavahit vuođđun go ráhkkanahttit ášši ovdagoddái ja suohkanstivrii giđđat dahje geasset, lohká Skániid sátnejođiheaddji Helene Berg Nilsen, gii doaivu ahte Skániid suohkan sáhttá ohcat beassat sámi giellahálddašanguvlui dán jagi.

Bargiidbellodat, Sosialistalaš Gurutbellodat ja bellodat Rødt, geat čakčat stivregohte Skániid suohkana, sohpege maŋŋel válggaid ahte Skániid suohkan jođáneamos lági mielde galgá ohcat beassat sámi giellahálddašanguvlui.

– Maid ovttastahtton suohkan berre searvat

Seammás go leat guorahallamin ahte galgá go suohkan searvat sámi giellahálddašanguvlui, de galget maiddái mearridit ahte galget go bissut sierra suohkanin vai ovttastahttet go Evenášši, Dielddanuori ja Skániid suohkaniiguin. Gielddaođastusa olis galgetge gielddat ovdal suoidnemánu 1. beaivve 2016 mearridit ovttastemiid birra.

Odd-Are Hansen

Skániid várresátnejođiheaddji Odd Are Hansen

Foto: Mathis Eira

Skániid várresátnejođiheaddji Odd-Are Hansen oaivvilda ahte jus Evenášši, Dielddanuori ja Skániid suohkanat ovttastahttojit, de ferte dát ođđa suohkan searvat sámi giellahálddašanguvlui.

– Mu mielas lea hui lunddolaš oažžut olles dán guovllu sámi giellahálddašanguvlui, lohká Hansen.

Hársttáid suohkan ii vel árvvoštallan

Eará molsaeaktu lea ovttastahttit Hársttáid ja dan biras suohkaniiguin. Hársttáid suohkana sátnejođiheaddji Marianne Bremnes ii loga iežaset vuos árvvoštallan sámi giellahálddašanguvlui searvat.

– Mii váldit ovtta lávkki hávális. Vuos fertet ollašuhttit daid áššiid mat leat min intenšunšiehtadusas ja de maŋŋil fertet geahččat leago vuođđu searvat sámi giellahálddašanguvlui, lohká Bremnes.

Skániid várresátnejođiheaddji Odd-Are Hansen gal oaivvilda ahte jus Skániid suohkan ovttastuvvo Hársttáid suohkaniin, de gal berre dát stuorra suohkan maid leat oassin sámi giellahálddašanguovllus.

– Mu jienas ii soaitte nu stuora dadjamuš nie stuora suohkanis, muhto mun goit áiggun ovdanbuktit iežan oainnu, ja dat lea ahte mun goit dajan juo dasa.

Ann-Mari Thomassen

Sámediggeráđi lahttu Ann-Mari Thomassen

Foto: Mathis Eira / NRK

Ilus

Sámediggeráđi lahttu Ann-Mari Thomassen lea ilus go Skániid suohkan dál lea suokkardallagoahttán fas ahte galget go ohcat beassat sámi giellahálddašanguvlui.

– Mu mielas lea hui buorre go Skániid suohkan lea fas váldán dán barggu ovdan ja árvvoštallame dien. Jus lea áigumuš ja dáhttu seailluhit ja nannet sámi perspektiivvaid márkosámi guovllus, de berrejit Evenášši, Dielddanuori ja Skániid suohkanat sámi giellahálddašanguvlui, lohká Thomassen.

Ihttin ja bearjadaga lágidage Sámediggi gielddaseminára Romssas, gos áigot digaštallat earret eará movt sáhttet gielddat vuhtiiváldit sámi beroštumiid gielddaođastusa bargguiguin ja maid mielddisbuktá ođđa gielddastruktuvra sámi ássiide.