NRK Meny

Gánnáhahtti musihkka ja girjjit

– Sámediggeráđđi doarju Dáiddárráđi gáibádusa ásahit sisaoastinortnega musihka ja čáppagirjjálašvuođa váste, nu lohká ráđđelahttu, Vibeke Larsen (Bb). Ulbmil lea ahte girječállin ja šuokŋadahkan galggašii šaddat gánnáhahtti.

Vibeke Larsen
Foto: Arbeiderpartiets sametingsgruppe

Artikkelen er flere år gammel.

– Jos Sámediggi dál lea čuovvoleamin Sámi Girječálliid Searvvi (SGS) máŋgalot jahkásaš gáibádusa, de dat han lea illu sáhka, lohká jođiheaddji Issát Sámmol Heatta. Son lohká ahte muittuha badjelgeahččanvuođa go dárogirjjiin lea sisaoastinortnet, muhto ii fal sámi girjjálašvuođas.

Sámi Dáiddárráđđi lea dáid beivviid šiehtadallamiin Sámedikkiin, earet eará doaibmadoarjagiid ja dáiddafoandda ruhtadeami sturrodagas. Orru leamin stuorra ovttaoaivilvuohta ásahit bargolávdegotti mii galgá guorahallat leago vejolaš dávviriikkalaš sisaoastinortnega ásahit.

Issát Sámmol Heatta

Issát Sámmol Heatta

Foto: Anne Olli / NRK

Olu jagiid rahčan

Sisaoastinortnet ášši lea leamaš dádjat juo jahkásaš gáibádus Sámi Girječálliid Searvvis. 90-logus ásahiii Sámiráđđi 3-jahkásaš dávviriikkalaš geahččalan-ortnega. Ulbmil lei doarjut sámi girječálliid. Ortnega bokte ostte gaskkal 200-300 girjji ásahusaide ja girjerádjosiidda. Dien láhkái galggai sámi girjjálašvuohta šaddat olahahtti ja gánnáhahtti.

Ii oktage girječálliid gaskkas, geaiguin sámeradio lea háleštan, dieđe riekta manin ortnet heaittihuvvoi.

– Jagi 2006 rájes lea fas Sámi Girječálliid Searvi aktiivvalaččat bargagoahtan ožžodit ortnega doibmii. Mis lea leamaš jurdda nannet girječálliid dietnasa, go bálká manašii njuolga čállái. Dássážii lea sámi girječállin leamašan uhcán gánnáhahtti, muitala Issát Sámmol Heatta (SGS).

Guhká vástitkeahttá

– Searvvi oaidnu lea ahte sisaoastinortnet galggašii šáddat dávviriikkalaš ortnegiin. Mii leatge máŋggaid reivviid čállán buot golmma riikka sámedikkiide ja Sámi parlamentáralaš ráđđái ovddidit ášši, muhto sii eai leat dássážii beroštan vásitidit reivviid, šálloša Heatta.

Sámediggeráđđelahttu, Vibeke Larsen mieđiha ahte gulahallan lea leamaš váilevaš. Lea Sámi Dáiddárráđđi gii dál šiehtadallamiid oktavuođas lea gáibiidan ahte sisaoastinortnet ásahuvvo, sihke čáppagirjjálašvuođa ja musihka váste. Šiehtadallamat loahpahuvvojit suoidnemánu 15.beaivve.

Miehtá Sámi

Seammás deattuha Vibeke Larsen ahte bargiidbellodahkii ja ráđđái lea dehálaš ahte sámi girjjálašvuohta ja musihkka lea olahahtti miehtá sámi, iige dušše fal Kárášjogas ja Guovdageainnus.

- Jos Sámi parlamentáralaš ráđđi ii doarjju ortnega, de áigu norggabeale Sámediggi, otná ráđiin, almmake doarjut sisaoastinortnega, lohká Larsen.

Gula ášši