Sis váilu dat «rivttes » sámi identitehta

Stuorát oassi mearrasápmelaččain dovdet iežaset badjelgehččojuvvon eará sápmelaččaid ektui. Ollugiidda lea dát gártan dakkár noađđin ahte sii loahpas vel dán dihti leat buohccán. "Skábma" festiválas šaddáge ságastallan sámi identitehta birra.

Synnøve Persen

Synnøve Persen

Foto: Marit Sofie Holmestrand / NRK

Bearjadaga álgá Skábma nammasaš festivála Gilivuonas ja Dáigevuonas Davvesiidda gielddas. Dáigevuonas lágiduvvo lávvardaga ságastallan mas fáddán lea sámi identitehta.

Ságastallamii servet earret eará bloggár Max Mackhe, Tromssa Universitehta Ivar Bjørklund, sámediggeáirras Sandra Márjá West ja govvadáiddár ja girječálli Synnøve Persen, gii ássá Porsáŋggus.

Dehálaš háleštit dán birra

Synnøve Persen lohká leat dehálaš riddoguovlluin ságastallat sámi identitehta birra.

– Sápmelaččain riddoguovlluin, nugo Gilivuonas ja Dáigevuonas, ii leat sámi identitehta dat seammá go siseatnamis. Dávjá návdet sámit sis eatnamis ahte sis dat lea vástádus dasa mii sámi identitehta lea, lohká Persen.

Son čilge ahte go mearrasápmelaččat ohcagohtet identitehta ođđasit, de eai soaitte diehtit justa mii dat lea, ja danne lea siddjiide dehálaš ráfis beassat ohcat ruohttasiiddiset, ja oktavuođaid mat sis leamašan.

Čuohcan dearvvašvuhtii

Govvadáiddár ja girječálli Synnøve Persen lohká maid ahte ollugat, geat ásset mearrasámi guovlluin, máŋgii dovdet iežaset badjelgehččojuvvon go earát eai oainne sin doarvái sápmelažžan.

– Oppalohkái leat mearrasápmelaččat áiggiid čađa gártan vásihit garra vuostebiekkaid, mat loahpas vel leat čuohcan sin dearvvašvuhtii, lohká Persen.