Badjelaš mánu áigi bođii váivves ođas. Simmona Máhtte, guhte juoiggai Sámiid Ædnan-luođi, lei vádjolan.
– Son dohppii erenoamáš vejolašvuođa
Sámedikki bealis lei dievasčoahkkinjođiheaddji Tom Sottinen hávdádeamis.
Son sártnui olbmuide geat ledje čoahkkanan girkui muittašit Simona Máhtte morrašis.
Tom Sottinen lei Sámedikki bealis hávdádeamis, ja deattuhii man stuorra árbbi Simmona Máhtte guođđá Sámi kultuvrii.
Foto: Berit Solveig Gaup / NRK– Máhtte lei dušše 21 jagi boaris go soai Sverre Kjelsbergain šattaiga beakkálmasat olles riikkas. Sámiid Ædnan luohti hirpmástuhtii maid olles Eurohpa go oassálasttiiga riikkaidgaskasaš lávlufinálas, logai Sottinen.
Sottinen muitalii maid ahte Simona Máhtte lážii dili earáide geat bohte su maŋŋá.
– Go son loktii luođi ođđa lávddiide, de son lei ovdanvázzi luođi ovddas, vai dat ge šattai dohkkehuvvon musihkkašládjan, muitalii Sottinen Máze girkus.
Šiehtadeigga deaivvadeami mii ii šaddan
Svein Suhr lei nubbijođiheaddji álbmotakšuvnnas Álttás, ja jođihii maid buot akšuvnnaid Mázes.
Svein Suhr muitala ahte leat oalát buori muittit iežas skihpáris.
Foto: Berit Solveig Gaup / NRKSon lohká NRK:ii ahte muitá bures go Simmona Máhtte juoiggai Sámiid Ædnan.
– Dan luođis duođai lei stuorát fápmu go ruvttas. Dat attii sámi álbmogii doaivaga 1970-logu loahpas, dadjá Suhr.
– Muittašan Máhtte dan áiggis. Das maŋŋá de doalaheimme buori oktavuođa, ja letne deaivvadan máŋgga sajis máilmmis.
Maŋimuš háve go Svein Suhr háleštii olbmáin, de leigga soai guktot Thailánddas. Soai šiehtadeigga deaivvadit restauránttas maŋit beaivve.
Dat deaivvadeapmi ii goassige šaddan.
– In diehtán ahte Máhtte lei nu buozas go lei. Seamma beaivve go galggaime deaivvadit, de logan Facebookas mii lea dáhpáhuvvan. Dat gal lei ahkit, lohká son, ja moraš gullogoahtá jienas.
«Luođis eanet fápmu go ruvttas»
Simona Máhtte lea dovddus Sámiid Ædnan luođi dihte. Soai Sverre Kjelsbergain ovdanbuvttiiga luođi Melodi Grand Prix gilvvus 1980:s.
Dan áigge ii lean luohti gal lunddolaš oassi Norgga musihkkamáilmmis, muhto Simmona Máhtte lážii dili boahtteáiggi juigiide.
Lávlla guoskkahii earet eará eamiálbmogiid rivttiid Áltá-ášši oktavuođas.
1979: Maiddái Simmona Máhtte oasálasttii dáistaleapmái Áltá-ášši oktavuođas.
Foto: Erik Thorberg / NTBTom Sottinen čalmmustahtii maid Simona Máhte beroštumi Áltá-áššái su sártnis Máze girkus. Son gesii ovdan ahte lea earet eará su dáistaleami dihtii ahte sii sáhtte otne Mázes čoahkkanit, go giláš ii gártan čázi vuollái.
– Máŋgga láhkai de lea dát gutnálaš vuohki giitit su dáistaleami ovddas. Son han geavahii olu áiggi rahčat Máze giláža ovddas, ja dulvadeami vuostá, logai Tom Sottinen.
Guldal ja geahča go Sámiid Ædnan gulloi vuosttaš háve 1980:s
Norsk finale i Melodi Grand Prix 1980 - Eurovisjonens slagerkonkurranse. Bidrag er denne gang bestilt fra ti komponister - unge, norske musikere, pop-, jazz- og visefolk. Kveldens artister er Anita Skorgan, Jahn Teigen, Radka Toneff, Åge Aleksandersen, Hilde Heltberg, Henning Sommerro, Alex, Nina Askeland, Inger Lise Rypdal og Sverre Kjelsberg. Kringkastingsorkestret dirigert av Egil Monn-Iversen. Programleder: Åse Kleveland. Regi: Inge Lotsberg. Nostalgi når du vil! Gjensyn med NRK-historie.
