Kárášjohkalaš Simen André Varsi Johnsen (25) girdigođii čáhcegirdiin 17-jahkásažžan guovtti ruovttu gaskka, Kárášjoga ja Molleža gaskka. Mollešjohka lea oarjjás, 50 kilomehtera eret Kárášjogas.
Son girdigođii ovdal go biilakoartta fidnii.
– Mánnán ledje ovdagovvan dat geat girde čáhcegirdiiguin. Dalle smihtten ahte dien háliidan mun dahkat go mun stuorun.
Dađibahábut ii dinen das ruđa, ja válddi dasto joatkkaoahpu.
Álgo jagi čađahii son 14 eksámena 14 iešguđet fágas. Nuppi jagi lei hárjehallan, ja dalle beasai hárjehallat girdit. Dál sáhttá Simen leahkit nubbe-pilohtan ruvttogirdis, ovdamearkka dihte SAS ja Norwegian girdiiguin.
Norgga girdisearvvi nubbijođiheaddji Jo Bjørn Skatval muitala ahte dárbu eambbo pilohtaide stuorru, ja ahte stuorra fitnodagat ohcet hárjánan pilohtaid.
– Bargohárjáneapmi dieđusge váilu jus lea aiddo geargan oahpuin, ja dalle ferte geahččalit fidnet hárjehallama smávva girdiid girdimis, dahje oastit kursa ahte beassat hárjehallat stuorát girdiin girdit. Dat sáhttá máksit 150 000-250 000 ruvnnu.
– Dasa lassin oaidnit mii ahte dađistaga ohcet álkit vugiid oahpahit pilohtaid, ja háliidit maiddái geahpedit pilohtalogu cockpitas, muhto dárbu pilohtaide lagamus áiggis dattetge stuorru, čilge Skatval.
Boahtte lávki Simenis lea ohcat barggu, ja son háliida Norggas bargat.
– Livččii hui miellagiddevaš Widerøes fidnet barggu vai beasan Davvi-Norggas girdit. Dáppe leat heajos dálkkit ja danin gelddolaččabut.
Oahpai sámegiela
– Giellagáibádusat pilohtaide lea eaŋgalasgiella, muhto lea ovdamunnin máhttit gielaid maid geavahit dain guovlluin gos girddát, dadjá Skatval, ja lasiha:
– Okta Nuorta-Norgga pilohta oahpai sámegiela danne go girddii maiddái Finnmárkui.
Ja dál soaittát ge gullat Simena sávvamin buresboahtima sámegillii.