NRK Meny
Normal

Sii lohket girjjiid ovttas

Vuotnabahtii, Isak Saba guovddážii, čoahkkanit penšunisttat duorastagaid lohkat sámegiel girjjiid. Sii leat šaddan juo oalle njuovžilat lohkat sámegiillii.

Johanna Schanche, Maggi Teigen ja Isak Mathis Balto

Johanna Schanche, Maggi Teigen ja Isak Mathis Balto

Foto: Anne Olli

Penšunisttat leat viššalat boahtit Vuotnabahtii lohkan deaivvademiide. Muhtimat vudjet guhkes mátkiid vai besset searvat lohkamiidda. Isak Saba guovddážis sii deaivvadit. Doppe jugadit gáfe, ságastallet ja lohket jitnosit vurrolagaid. Ná sii leat juo guhkit áigge dahkan. (Vuolemusas jearahallan)

Leat njuovžilat lohkat sámegillii

Sii lohket oalle njuovžilit girjjis. Ja lohkanbottuid lohket leat ávkkálažžan, go dál sii juo sáhttet lohkat sámi áviissaid ja eará čállagiid maid. Ovdal illa gillejedje stávet sámegillii, muhto dál leat sii nu hárjánan lohkat sámegillii ahte illudit lohkan bottuide.

Ohppet olu girjjiin

Lohkandeaivvademiin ohppet sii oalle olu. Ohppet dakkáraš áššiid main ovdal eai leat diehttán olus. Dál lohket sii Jens Andreas Friis birra. Son lei gielladutka ja girječálli. Dál dihtet sii ollu dán albmás, lohket penšunisttat.

Rámidit guovddáža bargiid

Penšunisttat rámidit Isak Saba guovddáža bargiid. Go sii leat leamaš nu viššalat oahpahit sin sámegiela dálá čállinvuogis. Ja dál sii gal juo leat oahppan nu olu ahte čállet maid veaháš sámegillii. Erenomážit rámidit sii Signe Iversena ja Signe Erke Store.