– Dan dihte go Silje Karine Muotkas lea dat ovddasvástádus mii sus lea ráđis, ruvke ja máŋga eará areálaáššiin, de son sáhttá fallehuvvot sihke dáččamedias, politihkalaš gilvaleddjiid ja earáid gaskkas.
Nu lohká sámediggepresideanta Aili Keskitalo, gii dajai dán liigeriikkačoahkkimis maŋŋel go ledje válljen Silje Karine Muotka ođđa presideantaevttohassan čavčča sámediggeválggaide.
Garra sánit ja cielaheapmi
Sámediggepresideanta oaidná ahte fertii geahččalit buktit dákkár várrehusa vai NSR miellahtut leat juoga ládje ráhkkanan dasa.
– Mun lean vuohttán ahte Silje Karine Muotkas lea min searvvis leamaš guovddáš rolla nugo áššis ja das fallehuvvo sihke persovnnalaččat, muhto maiddái politihkalaččat ja mun orrume vuohttime ahte muhtimat bidjet su dego dakkár vašálažžan, lohká Keskitalo.
Keskitalo čujuhii earret eará artihkkaliidda mas Muotka fallehuvvo. Dain artihkkaliin lea Muotka gohčoduvvon gielisin.
Son ballá ahte muhtimat maiddái bohtet gilvit giellásiid Muotka birra, nu gohčoduvvon konspirašuvdnateoriijaid.
– Mii fertet leat gergosat vástidit daid, lohká Keskitalo.
Geahččalan suddjet bearraša
Silje Karine Muotka lohká ahte son gal lea geahččalan dása ráhkkanit, muhto ii leat nu álki go áviissat ovdamearkka dihte leat čállán ahte son givssida mearrasámi guovlluid dahje ahte son gielista.
Silje Karine Muotka lea vásihan ahte leat gohčoduvvon gielisin ja ahte son givssida mearrasámi guovlluid.
Foto: Berit Solveig Gaup / NRK–Mu isit lea earret eará cealkán eret áviissaid gos ollu dakkár falleheamit bohtet suddjen dihte bearraša, muitala Muotka.
Ballá fallehemiid baldit
Son lohká ahte diehttelas su máná guovttos oaidniba mii čállojuvvo ja soai jearaheaba mas dás lea sáhka ja manin leat dakkár garra čuoččuhusat eatni vuostá.
– Mun geahččalan čilget sudnuide mas lea sáhka ja mii lea ášši duogáš, lohká son.
muhto son vuorjašuvvu jus olbmot garvet searvamis politihkkii go ballet fallehuvvot.
– Mii fertet láhččit dili vuoi olbmot dovdet ahte sii sáhttet oassálastit, dadjá Muotka.
