Sihti tsieggit gábmásienav

Jus Ájluovtan, Divtasvuonan la ja hálijda miehtsen váttsatjit, ihkap la hárjjánam váttsatjit Ájluovta jávrregáttev oabme skåvlås. Valla gå dálla danna váttsatja de ælvá guovllo ij la dálla desti nav gåktu dat åvddåla lij.

Jávrregáttev la rahte boahtám gånnå bálggá lij åvddål, ja miehtsen danna li tsieggiduvvam grillagoahte ja sehka. Ja danna l álu juoga mij dáhpáduvvá, ulmutja dåjmadime juojnak.

Guovllo gåhtjoduvvá dálla Ájluovta doajmmapárkka, ja nav gåk namma subtsas de la guovllo párkka gånnå duo-dá dåjma galggi liehket.

Dáj biejvij ådå asstoájgedåjma rabáduvvi, duodden li planigoahtám gábmasienav.

Paintball

Ájluovta doajmmapárka oajvve Robert Johnsen la NRK-reportárav válldám maŋen subtsastittjat dåjmaj birra ma guovlluj galggi boahtet.

– Dán guovlon sjaddá paintballsaljo.

Jur dálla li sij gárvedime paintballsaljov mij dáj biejvij la gárves ja gånnå dåhkki paintballav spellat. Paintball la sierralágásj suohtastallamspella gånnå oassevállde paintballbirssujn vuotjatji nubbe nuppev smávva málaluodagij. Dat máhttá speladuvvat gånnå luonndo la suoddjim ja máhttá aj speladuvvat sierra paintballsjaljon. Ja dálla Ájluovta doajmmapárkka l jur gárvedime dakkir sierra paintballsaljov párkkaj.

– Paintballsaljo la 25 gærddo 35 mehtera ja mij dálla jerav tsieggip, lip juo sjárav salljuj dævddám ja galggap hárenisájt tsieggit man duohkáj dåhkki tjiehkádit.

Smáv lávkij åvddånam

Ájluovta doajmmapárkka la åvddånam smáv lávkij, subtsas Johnsen. Álgon sij vuostak rahtev biggijin, ja de tsieggijin guovlluj grillagoadev ja segav.

– Suohtas la luondon liehket. Ulmme l dahkat guovlov rahpusin moattelágásj dåjmajda vaj moattes galggi máhttet guovlon liehket ja danna hávsskudallat.

Valla siján li ienep plána.

– Duodden grillagoahtáj, sehkaj ja paintballsalljuj de galggi aj dahkat sádduvolleybállsaljov, frisbeegålfa-spelav ja rijddimsjaljov, subtsas Johnsen.

Nuora dudálattja

Ja nuora li gåjt riek dudálattja dájda dåjmajda ma li boahtemin doajmmapárkkaj.

– Doajmmapárkka la huj tjáppa sadje. Dát vaddá nuorajda buorre asstoájggefálaldagájt ietján gå jur bállotjiektjam ja vuodjam baseŋŋan, javllá 16-jagák Elias Olafsen.

Divna galggi máhttet adnet

Juo uddni párkka aneduvvá tjabu skåvlås ja mánájgárdijs, duodden ietjá viesádijs. Párkkajådediddje Robert Johnsen diedet párkka la hiebadum váj divna galggi máhttet párkan liehket.

– Lip vedjav dahkam vaj divna galggi máhttet párkav adnet.

Plánigoahtám gábmásienav

Ja duodden daj ietjá dåjmajda de li sij aj plánigoahtám aktisattjat Ájluovta doajmmamárnánijn jus párkkaj dåhkku tsieggit sienav, ja dat ij sjatta dábálasj siedna,valla majt sij li gåhttjum gábmásiedna.

– Siendna sjaddá lahkke gámalágásj mij galggá doajmmat siednan gå la dárbbo stuoráp dáhpádusájda, ja gå dat ij la anon de galggá doajmmat vuorkudaksadjen márnán gálvojda subtsas sån.

GEHTJA VIDEOAV GÅ PAINTBALLSALJO ANEDUVVÁ: