– Mån lav iesj æjgát ja ælváv majt máná javlli ja dahki. Sidáv hasodit æjgádijt tjuovotjit gåktu oahppe ja æjgáda ulmutjahtti skåvlån ja asstoájgen.
Dav javllá Divtasvuona suohkanoajvve Tor Asgeir Johansen.
Ájluovta skåvllå Divtasvuona suohkanin la 7. sajen Åhpadusdirektoráhta guoradallamin skåvlåjs ållo givsedimijn jagijn 2010, 2011 ja 2012. Guoradallamin vásstedi 26,5 % oahppijs sij li givseduvvam skåvlån.
Tálla båhti dajs jahkásasj oahppijguoradallama gatjálvisájs givsedime birra vássteduvvam lánda oahppijs giehttjit ja lågåt klássan. Muhtem unnep skåvlå e almoduvá danen gå li nav unnaga vaj sjaddá máhttelis gæhttjat gudi li oahppe.
Æjgáda vierttiji liehket diedulattja
Æjgát Ivar Otto Knutsen javllá sån la iehpesihkar jus givsedibme l gáhtum Ájluovta skåvlån, valla javllá æjgáda aj vierttiji válldet åvdåsvásstádusáv givsedime åvdås skåvlån.
- Vierttip åvdåsvásstádusáv válldet ietjam mánáj åvdås, javllá æjgát Ivar Otto Knutsen.
Foto: Sander Andersen / NRK– Midja æjgáda vierttip åvdåsvásstádusáv válldet ietjam mánáj åvdås, ja sáhkadit mánáj vaj e galga iehtjádijt nuppástallat. Ij la dåssju Ájluovta skåvlå vihke, midja æjgáda vierttip aj åvdåsvásstádusáv válldet.
Dálla suohkanoajvve suv doarjot.
- Skåvllå givsedimev æjgátságastallamin giehtadallá vaj æjgáda diehti majt skåvllå dahká, ja gånnå skåvllå aj æjgádijda javllá sij vierttiji tjuovvot majt máná dahki. Iesj lav diedulasj dán birra. Æjgáda vierttiji liehket diedulattja majt mánájda oahppi, dan diehti gå álu vuojnnep máná æjgádijt tjuovvu, javllá Johansen.
Båhtusijt vuojnni
Suohkanoajvve dåbddå givsedimdilev ja javllá suohkan la ålov dájna barggam.
– Dåjmajt álgadijma mánájgárdijn ja skåvlåjn gånnå vuojnijma lidjin gássjelisvuoda ja givsedibme, vaj oahppe ja máná galggin bierikvuodav vuojnnet.
Johansen subtsas suohkan la jåhtuj biedjam moadda prosjevtajt ma dáv giehtadalli, sij li givsedimmanifestav vuollájtjállám ja suohkana åhpadiddje li kurssiduvvam gåktu givsedimev giehtadallat.
– Barggap vaj vuojnno galggá rievddaduvvat Divtasvuonan ja vuojnáv båhtusijt dajs dåjmajs majt lip tjadádam. Dát la ássje man birra ednagav berustav ja dav sjattav tjalmostahttet åvddålijguovlluj aj. Vierttip tjadádit buorre prosessav majt sjaddap joarkket
