Inti Condo ii gávdnán makkárge eará čovdosa Guovdageainnus beassát Kárášjohkii mannan vahkkus, go iežas ránnjás Roman:as luoikkahit sihkkela.
Inti áigo dutkat movt sámegiella ja su iežas giella, quichua, ovdána ja vuoruhuvvo ođđaáigge sosiála media máilmmis, ja dan oktavuođas lei šiehtadan máŋga NRK Sámi bargiid jearahallat su masterpilohta bargui.
Áidná čuolbma das lei ahte su gáldot ledje 130 km duohken.
Inti lea boahtán Ecuadoras, Lulli Amerihkás, studeret álgoálbmot mastera journalistihkas Sámi Allaskuvllas.
Son atná iežas Puruha álbmoga árbevirolaš biktasiid juohke beaivve. Muhto mátkái lei goitge bures gárvodan, muitala son.
Inti bisánii guđa geardde bosihit. Sus lei niestti ja jugus mielde.
Son fuomášii jođánit ahte ii olle Kárášjohkii čieža ja bealle diimmus.
Googlemap ii lean vuhtiiválddán dan go geainnus ledje olu miehte- ja vuosteluohkát. Inti váibbai moadde miilla ovdal Kárášjoga
Ja sullii guđa áigge sevnnjodišgođii nu ahte Inti mearridii sáhtu darvvihit belggiin. Birrasiid 10 biilla vudje su meattá.
Loahpaloahpas lei muhtun olmmái gii bisánii ja válddi su mielde Kárášjohkii.
Inti beasai jearahallat NRK-bargiid ja lea dál addán sisa su masterpilohta.
Roman ii lean nu duhtavaš go gulai ahte Inti lea guođđán su sihkkela Kárášjohkii, muhto lea buoremielas go olmmái olli dearvan ruoktot.