NRK Meny
Normal

Sihkkarasttit giliskuvllaid

Dán vahkkus galget sámedikki ovddasteaddjit deaivvadit Máhttodepartemeanttain ja okta gáibádusain lea fitnet sierra ortnega mainna hehtte ahte boaittebeale skuvllat sámis heaittihuvvojit.

Egil Olli og Laila Susanne Vars
Foto: Sigve Nedredal / NRK

Sámedikkis oaivvildit ahte jos giliskuvllat sámi guovlluin heaittihuvvojit, de ii leat dat vahágin dušše gilážiidda, muhto stuorra vahát maid sámegilli ja kultuvri.

Olli ja Vars

Sámediggepresideantta Egil Olli ja várrepresideantta Laila Susanne Vars vuolgiba Osloi deaivvadit Máhttodepartemeanttain ja čoahkkimis lea sunnos dáhttu čilget dán dili.

– Munnos leat konkreahta čovdosat dasa ahte mo dien sáhttá čoavdit ja nu hehttet eambbo heaittihemiid, go mii han leat sámegiela doaibmaplánas evttohan sierra ruhtaordnegiid boaittobeale skuvllaide, lohká Vars.

Sámegiela doaibmaplána lea Sámediggi ja Ráđđehus ovttas ráhkadan.

Vars maid rámida dan go Máhttoministtar Kristin Halvorsen oaidná dán hástalusa ja son lea iešguđetge fylkkamánnis jearragoahttán mo dán dili sáhttá čoavdit.

Jearahit diliid birra

Sámediggi lea bivdán 17 gieldda sámi guovllus čilget makkár dilli sis leat dán ektui.

Sirpmá skuvlla Deanus lea okta skuvllain maid dávjá árvvoštallet heaittihit, gieldda ruhtavátnivuođa geažil.

Sirpmá skuvllarektor Sonja Guttorm lea ilus go dál ožžot doarjaga Sámedikkis.

Čuohccá gillái

– Juohkehaš diehttá ahte čuohccá bargiide ja váhnemiidda go skuvla dávjá lea aittavuolde, muhto Deanus lihkkus diehttit ahte dát skuvla galgá dán válgaáigodaga bisuhuvvot, čilge Guttorm.

Manne lea nu dehálaš bisuhit dakkár skuvllaid gos eai leat go moadde oahppi?

– Skuvla lea váibmu, álmmolaš ásahus, ja dat eai leat galle juohke báikkis ja maiddái ahte jos skuvla heaittihuvvo de fertejit vuolgit eará báikkiide, mii sáhttá lea guhkes máŧki muhtimiidda, muhto vuohttán mii leat nákcen addit seamma fálaldaga go stuorra skuvllat, loahpaha Sonja Guttorm.