Evttohus sierra sámeministaris juohká oaiviliid

Eai buot sámi gielddaid sátnejođiheaddjit doarjjo NSR árvalusa, nammadit sierra sámeministara.

Stortinget og finnmarksordførere
Foto: Fotomontasje / NRK


Kárášjoga sátnejođiheaddji, Guovddášbellodaga Anne Toril Eriksen Balto mielas livččii buorre jus Norgga ráđđehus nammadivččii sierra sámeministara nie mo NSR árvala. Dát lea fuones jurdda, vástida ges bellodatskihpár, Mátta-Várjjat sátnejođiheaddji Cecilie Hansen.

- Iešalddis son ii duvdde dan, su mielas juohke ministtar berre ovddidit sámeáššiid iežas fágas.

Loga maid: Háliida sierra sámeministara

- Gáržžidivččego jurddašeami?

Guovddášbellodaga Cecilie Hansen, jáhkká dálá ortnega leat buot buoremus, go dát han su mielas geatnegahttá juohke ministara fuolahit sámi beroštumiid. Jus ráđđehus nammadivččii sierra sámeministara nie movt NSR árvala, de dát mielddisbuvttášii menddo ollu sierra beroštumiid.


- Dalle šattašii menddo olu dákkár “sektor” jurddašanvuohki, dadjá Hansen.


Muhto bellodatustit, Kárášjoga sátnejođiheaddji, Anne Toril Eriksen Balto, ii leat ovttaoaivilis. Son ges ollásit doarju NSR:a árvalusa.

- Dat livčče njuolggo bálggis ráđđehussii, gos mearrádusat dahkkojuvvojit, eaige livčče nu olu sierra lađđasat, maidda ferte čilget sámiid hástalusaid.

-Áššit ovdánivčče johttileabbot

Ná ges vástida Guovdageainnu sátnejođiheaddji Klemet Erland Hætta.

- Árvalus lea hui miellagiddevaš, jus leš fápmu bargat sámi gažaldagaiguin ja ovdánahttit sámi servodaga minister dásis, ná mannebat dan ii gánnehivčče iskat, jurdila Hætta.

Deanu várresátnejođiheaddji Hartvik Hansen lohká ges ná.

- Dan ovdamuni dát sáhttá addit, ahte livčče álkit oaččut sámi áššiid čađa ja gulahallat buorebut ráđđehusain.


Porsáŋggu sátnejođiheaddji Knut Roger Hanssen oaivvilda ges NSR:a liiggástallat go háliidit sierra sámeministara.

- Lea gal lohpi niegadit, dál orrot muhtin oasis sámi servodagaš menddo stuorra doaivagat, dadjá Hanssen.

Dá ášši darogillii: Ordførere uenige om ministerpost

GULDAL: