"Riđđu" lea beakkán Stuorabritannia čálli William Shakespeare bihttá. Ja dál leaba ge Riksteateret ja Beaivváš Sámi teáhter ovttasbargan dáinna čájálmasain.
Sámáiduvvon Shakespeare
Sámivuohta gal duođai lea oidnosis. Bagadalli lea ruoŧa sápmelaš Leif Stinnerbom. - Son láve dihtomielalaččat seaguhit osiid sámi kultuvrras bihtaide maiguin bargá, muitala Stinnerbom.
Guovddášrollain bihtás leaba sámi neavttárat Leammuid Biret Rávdná ja Svein Birger Olsen. Biret Rávdná neaktá áibmovuoiŋŋa ja Svein Birger ges lea sápmelaš guhte dadjat reŋgo vierrásiid.
Čájálmasa sáhttá measta gohčodit bearáš-ovttasbargun maiddái. Oainnát go bagadalli eamit Inger lea gorron eanaš oasi biktasiin, ja su bárdni Magnus lea ges ráhkadan musihka.
Sámi neavttáriid biktasiid lea ges Berit Marit Hætta gorron.
Sámit masset eatnamiiddiset
"Riđđu" lea dan birra ahte garra stoarbma doalvu fatnasa ja dan mátkkošteddjiid muhtun sullui gos orrot sápmelaččat. Dat aittoboahtán olbmot šaddet loahpas sullo stivrejeaddjin. Dát muittuha dan ahte duohta máilmmis leat sámit massán eatnamiiddiset dáččii. Muhto teáhterbihtá sápmelaččaiguin gal manná buorebut go duohta máilmmis lea dahkan.
Ávvudit 60 jagi doaimma
Dalle go Riksteater álggahuvvui 60 jagi dás ovdal, de johte Finnmárkkus teáhteriin. Dáinna lágiin háliidedje buktit juoidá positiiva sidjiide geat ledje massán sihke ruovttu ja dávviriid maŋŋil soađi.
- Sin ulbmil lea ahte diktit eanet eanet ja ođđa jienaid gullot iežaset teáhteris, dadjá Riksteateret hoavda Ellen Horn. Danne ovttasbarget máŋggain teáhteriin miehtá riikka. - Ja juste dat ahte dán jagi álggahit turneaid Davvi-Norggas lei oba lunddolaš, go jurddaša ahte dan seamma dahke dalle go teáhter ásahuvai 1949s, lohká Horn.
Ii amas sámi neavttáriidda
Beaivváš Sámi teáhtera neavttárat gal leat ovdal neaktán bihtáin maid William Shakespeare lea čállán, nu go "Hamlet" ja Macbeth". Ja sihke Svein Birger Olsen ja Leammuid Biret Rávdná leaba man nu ládje leamaš Shakespeare bihttáin mielde ovdal.
-Jáhkán ahte Shakespeare livččii duhtavaš jus boađášii dán čájálmassii, lohká Leammuid Biret Rávdná. - De han livččii fuobmán ahte fáddá man birra čálii 400 jagi dás ovdal, ain lea seamma áigeguovdil dál 2009s.