Ruošša beale leud dahje luohti gullo hárve rádios. Eaige Guoládaga leudejeaddjit nu dávjá čuččot daid stuorámus konseartalávddiid alde, vaikko doppe ain leat juoigit geat leudejit sihke árbevirolaš luđiid ja luđiid mas juigojuvvo searválaga musihkkáriiguin.
Leud galggašii gullot
Dál hálidivččii Guoládaga Sámi Radio hoavda, Valerij Tkatchev, ahte sin guovllu luohti ja sámi musihkka eambbo fas gullogoađášii. Danne árvala son ahte sáhtášii doallat Sámi Grand Prix oassegilvvuid dahje rátkkagilvvuid Guoládagas, ja Guoládaga Sámi Radio (GSR) livččii lunddolaš ovttasbargoguoibmi dán prošeavttas, lohká Tkatchev.
GSR ovttasbargoguoibmin
Tkatchev navdá GSR livččii lunddolaš ovttasbargoguoibmi Sámi Grand Prix lágideaddjiide. - Vuosttažettiin lea GSR friija, sorjakeahtes organisašuvdna. Mii eat leat gal juoigansearvi, muhto mu mielas lea lunddolaš ahte sorjakeahtes searvi livččii mielde lágideamen dákkár musihkkagilvvuid Ruošša beale Sámis, čilge Tkachev.
Guoládaga Sámi Radio hoavdda mielas livčče Sámi Grand Prix oassegilvvut Ruoššas mearkkašit olu guovllu juoigiide, luohtái ja dáid árvui. - Oassegilvvut Lujávrris livčče ávkin buot sámiide, navdá Tkatchev.
Miellagiddevaš jurdda
Juoigiid Searvvi ovdaolmmoš lea máŋgii ovdal árvalan doallat Sámi Grand Prix oassegilvvuid feara gos Sámis. Su mielas lea Tkatchev jurdda buorre.
Sámi Grand Prix buvttadeaddji Christina Hætta ii vel hálit maidige dadjat dán árvalussii. - Mii fertet buvttadeaddjoavkkus vuos doallat čoahkkima mas árvvoštallat dán jagi doaluid. Dalle easkka sáhttit dáidda áššiide dadjat maidige, čilge Christina Hætta.