Dál lea SGP-CD gárvánan. Beassášfestivála buvttadeaddji Klemet Anders Buljo muitala ádjánan buvttademiin danne go lei olu bargu gárvvistit musihkaid nu ahte daid sáhtii deaddilit CDii.
Ruhtadilli maŋŋonahtii buvttadeami
SGP-stivra mearridii ahte sii ieža buvttadit CDa, ovdal lea Sámi musihkkafeastivala oasttán cd-buvttadanbálvalusa. Ruhtadilli lea hedjonan, danne sii mearridedje ieža buvttadit CDaid, nugo SGP-cd. Maŋŋelis sáhttet sii eará CDaid maid buvttadit. SGP-stivra navdá iežaset nagadit buvttadit CD` hálbbibut.
500 SGP-CD leat prentejuvvon
Buljo ii dieđe man olu CDaid sii vuvdet, deháleamos sidjiide lea ahte lávlagat ja luođit leat dokumenterejuvvon. Jos dán 500-CD vuvdet johtilit, de deaddilahttet sii eanet CDaid.
Iežaset lohká dál bargan dáinna oalle guhká, muhto dál leat sii oahppan, danne navdá boahttejagi buvttadit CDa johtileabbot.