SGP-artista: – Mus ii leat jáhkku ahte Sámi Grand Prix-CD oba boahtáge

Sámi Grand Prix 2014 ja 2015 jagiid duppal-CD ii leat velge almmuhuvvon, vaikko Sámi musihkkafestivála bealis lohpidedje ahte dat galgá almmuhuvvat guovvamánus . Jovsset Biera Buljo lea beahtahallan, go fargga lea gollan guokte jagi dan rájes go son lei mielde Sámi Grand Prixas.

– Manahan ruđa ja čuojahanbargguid

– Diet ášši gal oro sin bealis biddjon eret. In jáhke ahte oba šaddáge CD. Ii leat gal nu somá go ii boađe CD. Mun livččen sáhttán dinet go čuojahit mu lávlaga radios, ja gánske livččen beassat eanet konsearttaid doallat ja festiválaide beassat mielde. CD han lea dego rekláma. Jáhkán ahte lean olu massán go ii leat almmuhuvvon.

Son lei 19-jahkásaš go lei mielde SGP:s. Su lávlla ii leatge gullon radios vel go CD ii leat almmuhuvvon.

– Dalle lei jurdda ahte in beroš vuoittángo vai ii, go beare CD:s beasan leat mielde, lohká Buljo.

– Mu sivva

Sámi musihkkafestivála buvttadeaddji Nils Johan Vars muitala ahte CD ja olggožat leat gárvásit deaddiluvvon, muhto de lea geavvan juoga mii dahká ahte eai sáhte vuovdigoahtit daid.

– Dat lea njulgestaga mu sivva, go dan mun livččen galgan diehtit, lohká Vars.

Go CD ráhkada, de galgá dieđihuvvot Nordisk Copyrightbyråai (NCB). Dasa dárbbašuvvojit rievttes báhpirat CD-oasseváldiin ja sis geain leat vuoigatvuođat šuoŋaide ja teavsttaide.

– Sii eai leat vuolláičállán dakkár báhpira mii addá midjiide rievtti dieđihit daid dohko.

Sávvá beassážiidda beassat almmuhit

Dat mearkkaša ahte dakkaviđe go son oažžu vuolláičállagiid ja beassá dieđihit daid NCB:ii, de lea sus lohpi vuovdit skearruid.

– Ipmirdatgo ahte oasseváldit vuollánit go ná guhkes áigi lea mannan?

– Dan gal ipmirdan áibbas bures, ii sáhte leat nu ahte máŋga jagi maŋŋil easka almmuhuvvojit CDat, lohká Vars, gii šálloša go lea mannan nu guhkes áigi.

– Vaikko leat olu eará sivat maid go ná lea šaddan, de lea dat goitge mu ovddasvástádus gii lean galgan CD gárvet ja almmuhit.

Vars sávvá skearru beassat almmuhit beassážiidda.