– Somá go seksa oahpponeavvut leat sámegillii

– Lea somá go seksa oahpponeavvut leat sámegillii!

Dán dadjá skuvllaoahppi Hánná Sofe Nystad, gii studere Sámi Joatkkaskuvllas, Kárášjogas.

– Seksuálaoahpahus ovccát-luohkás lei oalle váilevaš, ja lei maiddai eanaš dárogillii, dadjá Hánná Sofe.

Son čilge ahte sis eai lean dihtto oahpponeavvut mainna ohppe seksualitehta birra ollislaččat go son váccii ovccát-luohkás guovtte jagi áigge.

– Oahpaimat eanemusat luonddufágas go lei goruda orgánaid birra sáhka, eat ge oahppan maidege movt omd. homofiilaseksa lea. Oahpaimet aistton dušše dan «dábáleamos».

• Loga maid: Sámi Music Awards – Geahča geat vuitet bálkkašumiid

Sámi seksualitehta

Dál lea Sex og Politikk organisašuvdna jorgalan seksuála oahpponeavvuid davvi-sámegillii, maid almmuhedje diimmá čavčča.

– Leimmet galledeame muhtin skuvlla Deanus, go muhtin hástalii min jorgalahttit oahpponeavvuid sámegillii, ja dan hástalusa mii gal dieđusge válddiimet.

Nu dadjá Sex ja Politikk prošeaktamielbargi, Adele Straumsnes. Sidjiide lea dehálaš ahte seksuálaoahpahus gálga leahkit oadjebas.

– Lea dehálaš oažžut oahpponeavvuid iežas gillii. Erenomážit minoritehtaide nugo sápmelaččaide geain lea hui sevdnjes historjá.

– Muhtin ládje dat lea dego oažžut duođaštusa ahte mun han maid lean seamma dehálaš go dárogielagat, dadjá Straumsnes.

Oahpponeavvut sisdoallá čieža gihppaga mas juohke gihpagis lea sierra fádda.

Gihppagat čilgejit fáttaid nugo eastadanvugiid ja nuoskkesdávddaid, muhto buot áššiid mat fátmmasta seksualitehta.

– Dávjá deattuhuvvo nuoraide ahte sii sáhttet buohccát dahje šaddat mánáid ládje, ja sin eallin sáhttá billašuvvet jus leat seksuálalaččat aktiiva, dadjá Straumsnes.

Danin fuomášuhttá organisašuvdna positiiva belliid seksas, ja dáistalit norpmaid ja ovdagáttuid mat sáhttet soardit nuoraid

• Loga maid: Siljá vásihii mánnán ahte su bearaš vákšojuvvui 
• Loga maid: Sámi álbmotbeaivi lea lujávrilaččaid illubeaivi

Váttes sánit

Vaikko Hánná Sofe lea ilus go sánit mat čilgejit seksuála eallima, de ballá son ahte nuorat eai ane sániid.

– Mu mielas leat hirbmat guhkes sánit ja veaháš romes sánit maid olbmot eai boađe muitit, nu go omd. Goaŧŧočotta. In jáhke ovttage diehtit mii dat lea árgabeaivválaš ságáin.

Danin jáhkka Hánná Sofe ahte nuoraid mielas soaitá šaddat váttis daid geavahit.

– Dat lea áibbas váttis muitit daid sániid, olmmoš han gullá measta beaivválaččat buot daid sániid beare eŋgelas- ja dárogillii.

Hánná Sofe jáhkka sápmelaččat fertejit mánnán oahppat sániid jus galget darvánit.

– Sámis lea seksa oalle tabu-ášši, ja danin lea váhnemiin stuorra ovddasvástádus oahpahit mánáide ahte seksa lea dábálaš. Skuvllat maid berrejit álgit jo áigá oahpahit sániid vai oahppit áddejit mas lea sáhka, loahpaha Hánná Sofe.