Dološ dállu šattai turismafitnodat

Sevletunet eaiggát Gro Sevle válddii badjelasas dološ dálu 1987:s. Dalle lei jurdda ahte galggai šaddat bearrašii ruoktun, ja dan nammii soai isidiin divodišgođiiga dálu viesuid ja visttiid. Buot ledje mieskagoahtán ja čáhci maid váillui. Muhto suoli lei son álo jurddašan ahte gal livččii soma álggahit turismafitnodaga das. Ja logi jagi maŋŋel lei son gearggus váldigoahtit vuostá idjadangussiid.

Vuonccáviesus dahje láđus
Dál son nagoda fállat 20-30 olbmui idjadansaji hávális. De sáhttá oađđit juogo dološ váldoviesus, láđus, olgosávnnjis, vuonccáviesus dahje bárttain mat lea veahá dobbelis váris.

Stuora dimbbárláđus leat guokte ásodaga, okta vuollin ja nubbi bajit gearddis. Das leat ođđaáigáhaš gievkkanat ja basadanlanjat, muhto muđui leat dávvirat ja čigŋat vássan áiggiid muittut. Dološ vuonccaviesu maiddái leaba divodišgoahtán. Lea nu ođđamállet, čuovgat, čáppat ja ráinnas ahte lea ártet vel jurddašit ahte daid seinniid siskkobealde leat vuonccát monnen.

Olgostámpas lávggodit
Go lea su guossis, de oažžu ávkkástallat buot mii leš doppe. Sáhttá oaggut jávrrážis das bálddas, olgostámppa ligget ja das lávggodit jávregáttis, sávnnjodit, dolastit sierra dolastallanbáikkiin dahje juo guovdo šiljus, sáhttá spáppastallat dahje dušše vuoiŋŋastit soames muorrabeaŋŋkkas.

Go lea borranmiella, de sáhttá ieš gohkket dahje sus dingot borramuša. Buot lea dávgasit organiserejuvvon; galggašii leat juohke olbmo miela mielde. Dat fas mearkkaša ahte son ferte viššalit bargat. Muhto nu guhká go lea soma, ja olbmot lohket ahte lea hávski orrut earalágan sajin go dábálaš hoteallain, de dat addá sutnje ođđa searaid.

Ferte olbmuide liikot
Gro Sevle muitala ahte háliida humadit gussiiguin, oahpásmuvvat olbmuiguin. Dat lei su vuolggasadji go oba álggahii ge turistadoaimma. Olbmuiguin son hálidii bargat, gussiid duhtadit ja sidjiide fállat buori vásáhusa. Jos dasa ii liiko, de ii galgga oba jurddašit ge turismmadoaimma álggahit, oaivvilda son.

Nugo ieš lohká: jos son nagoda olbmuid duhtadit, olbmuide addit movtta ja buori vásáhusa, de son lea duhtavaš.