– Vuoitu ii nanne dušše luođi muhto maid olles sámi servodaga

– KEiiNO lávlla «Spirit in the Sky» gudnejahttá sámevuođa hui fiidnát. Diekkár unna gollegoaikkanasaid bokte dat ovdána sámi servodat, lohká juoigi ja servodatberošteaddji Ánde Somby.

Mannan lávvordaga vuittii KEiiNO Norgga Melodi Grand Prix finála. «Spirit in the Sky» lávlagis gávnnadit sihke luohte- ja pop-šuoŋat. Dal dat beassá gilvalit Eurovišuvnna finálas Israelas.

Vuoitu ii nanne dušše luođi muhto maid olles sámi servodaga oaivvilda Somby.

– Go min nuorat vuitet, de dat addá midjiide oinnolašvuođa ja illudahttá min servodaga ja addá midjiide eanet dorvvolašvuođa go ovdal.

Sámi luonddu osku vuođđun

Lávlla «Spirit in the Sky» muitala dáistalemiin maid olmmoš ferte dahkat ahte sáhttá leat dakkárin mii son lea. Joavkku lávlu Tom Hugo muitala ahte sámi luonddu osku lea vuođđun.

Joavkku juoigi, Guovdageaidnulaš Fred Buljo muitala ahte lea somá olahit viidát luđiin.

– Somá go nu máŋggas besset vásihit ja gullat sámi kultuvrra golliid dego luohti lea. Dál besset máŋga miljon olbmo gullat dan. Dát mearkkaša munnje hirbmat ollu ja sávvámis maid olles Sápmái.

Dán áigge lea ollu sáhka ruvkedoaimmain ja eará sisabahkkemiin. Ande Somby mielas lea vuogas go lávlla buktá ovdan sámi luonddu osku.

– Dát sáhttá maid addit áddejumi dasa manin sápmelaččat leat nu garrasat dasa ahte luonddu ii galgga billistit.

Lokte luođi árvvu

Juoigi ja sámi servodatberošteaddji Ande Somby oaivvilda luođi árvvu loktanit go gullo máilmmi musihkkalávddiin.

– Dán lávlagis lea nu somá go Fred lea nu čeahppi jávdat. Son geavaha dološ luohteteknihka. Ii gártta dego dábálaččat dákkár oktavuođain ahte mii geavahit daid melodiijabeliid luođis.

Luohti beaggá viidát

Luohti lea beaggán viidát maŋimuš áiggiid. Diibmá juoiggai Stjernekamp lávlungilvvu vuoiti Ella Maria Hætta Isaksen finálas. NRK Muitte mu-prográmmaráiddus leat Norgga beakkálmasat beassan oahpásmuvvat luohtái.

Eurovišuvnna finála lágiduvvo Tel Avivas, Israelas, miessemánu 18. beaivvi. Doppe sáhttet leat guokte juoigi lávddi alde. Boahtte lávvordaga lágiduvvo finála Ruoŧa Melodi Grand Prixas masa juoigi Jon Henrik Fjällgren lea beassan.

Luohti guktii ovdal Eurovišuvnnas

Luohti lea guktii ovdal gullon riikkaidgaskasaš Eurovišuvnna finálas. Simona Máhtte, Mattis Hætta ja Sverre Kjeldsberg searvvaiga gilvui 1980 «Sámi ædnan» lávlagiin mii šattai bivnnuhin Norggas.

Jagi 2000 searvvaiga Johan Sara jr. ja Roger Pontare lávlagiin «When Spirits are Calling my Name».

Mattis Hætta illuda KEiiNO vuoittuin. Vaikko Eurovišuvdna- gilvu čalmmustahttui viidát maid su áiggi, de lea dat sturron hirbmadit dan rájes.

– Máilbmi lea fuomášan sámi kultuvrra luođi bokte. Dat lea issoras suohtas. Mon sávan ahte maid Fjällgren beassá dán finálii, lohká Hætta.