Sávzzat ja gusat besset guohtut Herøyas
Sávzzat ja gusat sáhttet guohtut nu go dábálaččat Herøyas, Nordlánddas. Dán čállá Biebmobearráigeahčču preassadieđáhusas.
2022 giđa jámadedje badjel čuođi bohccot Herøyas veaikemirkkohusa dihte.
Seamma giđa ávžžuhii maid Biebmobearráigeahčču ahte guovllu boanddat doalahit omiid bealdduin dassážii go gávdnet gos mirkkoheapmi vuolgá.
Dál lea kártejuvvon man alla veaikedássi lei omiin, mat guhto Herøyas 2022 geasi. 33 sávzzas ja 10 gusas sáddejuvvojedje vuoivasat ja monimat veaikeanalysii. Ja dain ii lean mirkko.
Dán vuođul lea mearriduvvon ahte oamit sáhttet guohtut nu go dábálaččat dás duohko.
Stáhtahálddašeaddji ja politiijat eai leat vel gávdnan veaikegáldu, ja galget dahkat birasiskosiid guovllus. Eai jáhke ahte iskosiid bohtosat bohtet ovdal go guohtunáigodat álgá. Danin ii loga Šibitdoavttirinstituhtta bohccuid berret guohtut Herøyas ovdal go birasiskosa bohtosat bohtet.
– Lea várrugasvuođa-prinsihppa ja ealliidáimmahuššan, mii dahká manne eat ávžžut bohccuid guohtut sullos. Mii leat rávven boazosámiid, ja bivdit Šibitdoavttirinstituhtta čađahit ođđa árvvoštallama go birasiskosat leat analyserejuvvon, dadjá Biepmobearráigeahču ossodathoavda Helgelánddas Hege Osen.
