Sávvet eambbosiid beroštit Standing Rock dáhpáhusain

Sullasaš doaluid lágidedje Romssa šamánalaš lihttu bealis ikte Romssas, mas olbmot besse leat mielde doarjumin Standing Rock vuostálastimiid Amerihkás.

Šamánalaš lihtu jođiheaddji Inger Lise Nervik muitala ahte lágidit seremoniija Stuorradikki olggobeal Oslos, gos ovddidit ávžžuhusaid, lávlot ja čuojahit rumbbu doarjun dihtii Standing Rock Protectors joavkku. Son dadjá ahte sidjiide lea dehálaš čájehit doarjaga ja muitalit mii dilli Davvi-Dakotas lea.

– Mii oaidnit ahte Norggas ja Skandinávias muitaluvvo ja dihtet unnán dán áššis ja dan birra mii USA:s dál dáhpáhuvvá luonddu ja álgoálbmogiid vuoigatvuođaid dáfus, lohká Nervik.

Maŋimuš vahkkuid leat olu muitalan das mo USA eamiolbmot vuostálastet Dakota Acces Pipeline oljofitnodaga doaimmaid. Fitnodat lea huksemin oljobohcci, mii ollá Davvi-Dakotas Illinoisii.

Oljobohcci rasttilda Missourijoga, mas Sioux-álbmot oačču juhkančázi. Sii ballet dál ahte jus olju beassá golgat lundui, nuoskkida dat joga ja juhkančázi. Sii oaivvildit maiddái ahte oljobohccit billistit sin bassi ja kultuvrralaš báikkiid.

Mátkkoštit Standing Rockai doarjut

Maiddái sámis háliidit doarjut dáid álgoálbmogiid rahčamušaid stuorra oljofitnodaga vuosttá. Earret eará sámi artisttat Sofia Jannok ja Sara Marielle Gaup leaba almmuhan sosiála mediain ahte mátkkošteaba gosa oljobohccit huksejuvvojit.

Šamánalaš lihtu jođiheaddji Inger Lise Nervik oaivvilda ahte vaikko mii eat leatge doppe gos oljobohccehuksemat leat, de liikká lea dehálaš čájehit ahte beroštat.

– Mii gullat oktii ja dat mii dáhpáhuvvá máilmmis, váikkuha midjiide buohkaide. Dat ahte mii čájehat ahte mii doarjut nubbi nuppi lea earenoamáš dehálaš dán áigge.