Deanus ja Várjjagis leat olbmot geat hálidivčče duddjot vaikke makkáraš sámi dujiid, muhto de dárbbašivčče sii duodjedálu dahjege duodjebáji. Danne lea Nuorta-Finnmárkku duodjebagadalli Magnhild Mathisena stuorámus sávaldat gávdnat dálu Vuonnabađas gosa sáhtašedje ásahit duodjebáji.
Olbmot hálidit duddjot ovttas
Magnhils Mathisen lohká hui ollugiid nuorttabealde hálidit duddjot, muhto de dárbbašivčče sii veahkki ja oahppu, danne galggašii sis leat duodjedállu dahjege bádji. Ja dál son lea duođalaččat ohcamin dálu gos duojárat sáhtašedje gávnnadit duddjot. Iežas muitala ráhkadan hui olu minstariid, gákte-, silke- ja gahpirminstariid. De livččii beare duddjogoahtit jos livččii dállu.
Hálidivččejit neaskkinmášiinna
Magnhild Mathisen ii dieđe nagadit go sii skáhppot neaskinmášiinna, go dat lea oalle divrras mášiidna. Son diehtá gal ahte Guovdageainnus ja Kárájogas lea dakkáraš mášiidna, muhto ii dieđe lea go dáid vejolaš luoikkahit, iige dieđe sáhtášii go daid sirddašit.
Gámagoarrut leat «Gollit»
«Gollin» dat duodjebagadalli Magnhild Mathisen lohká leat daid nuoraid geat Nuorta-Finnmárkkus máhttet goarrut gápmagiid dahjege nuvttohiid. Danne son áinnas hálidivččii ahte siige beasašedje alkibut bargat, nu ahte ieža eai dárbbašivčče neaskit gápmasiid jiehkuin. Muhto neaskinmášiinnas son ii gal vuos dieđe. Váikke sis ii leaččage vuos duodjedállu de leat sis kurssat. Maŋimuš kursa lei Reisavuonas, doppe gorre sistedujiid.