Sávašedje stuorra luondduguovddáža guovddáš Sápmái

Kárášjoga várresátnejođiheaddji John Nystad (Sámeálbmot bellodat) ovdanbuvttii áŋgirit optimisttalaš plánaid Kárášjogas gaskavahku eahkeda.

– Kárášjoga gildii berre Bajit Anárjoga álbmotmeahci hálddašeapmi, ja danin lea maid lunddolaš ahte Kárášjohkii ásahuvvo álbmotmeahcceguovddáš, dajai Nystad olbmuide geat ledje čoahkkanan Kárášjoga servvodatvissui.

Boahtte mánu rájes doaibmagoahtá Bajit Anárjoga álbmotmeahccestivra. Stivrras leat mielde sihke Kárášjoga ja Guovdageainnu áirasat, ja dasa lassin Sámedikki. Anárjoga álbmotmeahcci leamaš dássái áidna álbmotmeahcci, mas ii leat báikkálaš hálddašeapmi Norggas.

Ođđa stivra váldá badjelassii ovddasvástádusa mii dássái leamaš Finnmárkku Fylkamánni duohken, namalassii hálddašit álbmotmeahci.

Plánejit sierra álbmotmeahcceguovddáža

Dál lea Kárášjoga gielddas dáhttu hukset maiddái álbmotmeahcceguovddáža. Sierra visti gos álbmotmeahcci hálddašeapmi lea, ja maiddái álbmogii diehtojuohkinkantuvra álbmotmeahci birra.

– Mis lea dáhttu ja jáhkku hukset álbmotmeahcceguovddáža Kárášjohkii, dadjá Kjell Magne Grønnli (Bb), guhte bargá álbmotmeahcceguovddáš plánain gieldda ovddas.

Muhto jus guovddáš galgá šaddat duohtan, de ferte ovttasbargu Guovdageainnuin.

– Direktoráhtta lea cealkán ahte mii galgat bargat ovttas Guovdageainnuin. De lea lunddolaš ahte mii jurddašat ovtta oasi dan álbmotmeahcceguovddážis Kárášjohkii, ja maiddái álbmotmeahcceguovddáža Guovdageidnui, oaivvilda Grønnli.

• Dá lea Tjømes ovdamearka mo álbmotmeahcceguovddáš sáhtášii hábmejuvvot

Evttohit stuorra oktasaš vistti álbmotmeahcceguovddážii ja ođđa giellaguovddážii

Álbmotčoahkkimis Kárášjogas bođii ovdan ahte leat optimisttalaš plánat álbmotmeahcceguovddážii. Ja háliidat dan dagahit stuorát guovddážin.

Bargojoavku evttoha dáid ásahusaid bidjat seamma robi vuollái:

• Álbmotmeahcceguovddáš
• SNO (Stáhta luonddubearráigeahčču)
• Kulturguovddáš (Sámiid Vuorká-Dávvirat, sámedáidda musea ja etnomusihkkaguovddáš)
• Luossahálddašeapmi (oassi Deanu luossaguovddážis)
• Turistaguovddáš
• Meahcástanturisma
• Giellaguovddáš
• Kafea
• Ovttasbargu Anár museain
• Bassevuovddi turisma
• Boazodoallohálddahus

– Sávvamis dát lea čađahahtti. Direktoráhta sávaldat lea ahte dát šattašii dakkár nana luondduguovddáš gos olbmot sáhttet fitnat ja oažžut daid dieđuid maid dárbbašit, muitala Grønnli.

– Ovdamearkka dihtii stáhta luonddubearráigeahčus, álbmotmeahccehálddašeaddjis, boazodoallohálddahusas. Nu ahte lea vejolaš gávdnat buohkaid doppe, dadjá Kjell Magne Grønnli.

Son lasiha ahte dása ii leat vuos lohpiduvvon ruhta, muhto ahte go ovttasbargu Guovdageainnu suohkaniin boahtá johtui, de maiddái lea vejolaš oažžut ruđalaš doarjaga sierra vistái.

• Nordlánddas lea sávaldat ahte sámehistorjá šaddá oassin álbmotmeahcceguovddážis

Gilvu álbmotmeahcceguovddáža hárrái

Guovdageainnu sátnejođiheaddji Johan Vasara (Bargiid bellodat) ii daja vuos ožžon ovttasbargojearaldaga Kárášjogas.

– Mun lean dušše media bokte gullan ahte Kárášjohka bargá álbmotmeahcceguovddážiin, nugo Guovdageaidnu juo lea bargan ollu jagiid, vástida Vasara NRK:i.

Son lea mielas ahte Kárášjohkii ásahuvvošii juoga mii čalmmustahttá álbmotmeahci. Muhto háliida Álbmotmeahcceguovddáža Guovdageidnui.

– Min bealis lea lunddolaš ahte guovddáš ásahuvvo Guovdageidnui, go measta olles álbmotmeahcci lea Guovdageainnu suohkanrájiid siskkobealde, cealká Guovdageainnu sátnejođiheaddji.