Stáhtaministtar, Erna Solberg, čállá Gáivuona suohkanii ahte suohkana hutkás árvalus skeŋket Háldi várrečohkka Supmii 100 jagi iešheanalaš stáhta ávvudeapmái, vuolggaha juridihkalaš hástalusaid, earret eará áhstalusat mat leat čadnojuvvon Norgga vuođđoláhkii.
Solberg lohka árvvoštallamin eará vuogas gálvvu man sáhtášii skeŋket Suoma stáhta 100 jagi iešheanalašvuođa ávvudeapmái.
Alimus várri
Háldi šattašii Suoma alimius várri, jus Norga skeŋkešii alimus várrečoahkká, mii lea 1361 mehtara allat Supmii. Gáivuona suohkana sátnejođiheaddji dadjá ahte riikkarájá šattašii sirdit 40 mehtarin, vai olles várri šattašii Supmii gullevažžan ja šattašii dasto Suoma alimus várri.
Stáhtaministtar čállá ahte ii leat sávahahtti dál čađahit rádjemuddema nu go Gáivuona suohkan lea árvalan.
Solberg čállá ahte riikkarájá sirdin lea sávvameahttun, ja dagahivččii juridihkalaš hástalusaid, ja danin sii eai sáhte doarjut Gáivuona suohkana skeaŋkaárvalusa. Solberg čujuha maiddái ahte viiddis beroštupmi dán áššái, čielgasit duođašta buorit gaskavuođaid Norgga ja Suoma stáhtaid gaskkas.
Beahtahallan
– Lea gal buorre go Stáhtaministtar lea válddán áiggi áššin bargat ja vástidit, muhto mun lean dattetge beahtahallan mearrádussii, dadjá Gáivuona sátnejođiheaddji, Svein O. Leiros.
Leiros čujuha maiddái dasa ahte Kártadoaimmahaga ovddeš váldoinšenevra , Bjørn Geirr Harsson, lea son guhte vuolggahii dien jurdaga, ja sii fertejit ovttas suinna guorahallat maid ja movt dál bargat ovddasguvlui árvalusain. Sátnejođiheaddji lohka áigut áigut geavahit váhkoloahpa ja vahku jurddašit maid ja movt sii dál fertejit duste čuožžiluvvon dili.
Golmmádas spábbačiekčanšillju
Svein O. Leiros dadjá ahte eanangáhppálagas mas dás lea sáhka ii leat stuorit go goalmmádas spábbačiekčanšillju. Leiros lohka áigut áigut geavahit váhkoloahpa ja vahku jurddašit maid ja movt sii dál fertejit dahkat.