NRK Meny
Normal

Evttohuvvon Sámi girkoráđi jođiheaddjin

Norgga Girku nominašuvdnalávdegoddi lea evttohan guovdageaidnulačča Sara Ellen Anne Eira Sámi girkoráđi jođiheaddjin.

Sara Ellen Anne Eira

– Galgá leat lunddolaš hupmat ja dovddastit ahte osku Ipmeláhččái, lohká Sara Ellen Anne Eira.

Foto: Åse Pulk / NRK

Cuoŋománus vállje Norgga girkoráđđi ođđa Sámi girkoráđi áigodahkii 2016-2019, ja Eira lea áidna evttohas jođiheaddjeámmáhii.

– Ii galgga leat heahpat leat oskkolaš

Sara Ellen Anne Eira lea 39 jagi, son lea bargan 13 jagi journalistan ja doaimmahushoavdan NRK Sámis ja dál son bargá oahpaheaddjin Sámi joatkka- ja boazodoalloskuvllas Guovdageainnus. Son lea čielggas mainna son áigu bargagoahtit jus válljejuvvo jođiheaddjin.

– Mu váibmoášši lea oažžut eanet mánáid ja nuoraid girkui. Háliidivččen ahte girku šattašii dakkár báikin gosa mánát ja nuorat dovdet gullevašvuođa, oadjebasvuođa ja maiddái háliidivččen bargat dan ala ahte nuoraide ii leat nu váttis dovddahit ahte sii oskot Ipmilii. Ii galgga leat heahpat muitalit ahte mun logan áhččemiinna ja oskkun Ipmilii.

Guovtti máná eadni muitala ahte otná servodagas ii leat nu lunddolaš hupmat oskku birra, muhto diehtá eanas sámi ruovttuin lea risttalašvuohta hui nanus ja dat oahpahuvvo ain mánáide.

– Mun dieđqn ahte eanas sámi ruovttuin lea ain hui nanus risttalašvuohta ja mii oahpahit mánáideamet risttalašvuhtii. Nu ahte mun jáhkán mis lea buohkain ruovttuin dat, muhto dan ahte duostat dovddastit dan almmolaččat ahte mii oskut Ipmilii ja ahte mii leat risttalaččat.

– Son lea dego sáddejuvvon

Anne Dalheim lea jođihan Sámi girkoráđi guhtta jagi ja lea nu ilus go nuorra davvisámi nissonolmmoš lea evttohuvvon jođiheaddjin.

Lean nu ilus go nuorra nissonolmmoš áigu lávket dán ámmáhii, ja dasa lassin de son sihke hupmá ja čállá sámegiela. Ja son lea nai oahppanolmmoš, skuvllaid vázzán ja olu bargovásáhus. Son lea dego sáddejuvvon midjiide.

Leder i Samisk kirkeråd Anne Dalheim

Dálá Sámi girkoráđi jođiheaddji Anne Dalheim

Foto: www.kirken.no / Kirken

67 jahkásaš lea ieš mearridan luohpat jođiheaddjin, son lohká olmmoš gal dovdá goas galgá heaitit.

– Lea veahá ahkit luohpat, lean oahpásnuvvan olu olbmuiguin ja mii leat olahan nu olu, muhto dál dovddan ahte lean doarvái bargan Sámi girkoráđi ovddas.

Sámi girkoráđđi

Sámi girkoráđđi lea ráđđi mii galgá ovttasráđiid Norgga girkuin láhčit dili sápmelaččaide, ja maiddái earret eará háhkat dieđuid sámi girkostallama birra. Girkoráđđi ásahii ráđi 1992. Ráđis leat čieža lahtu, ja ráđis leat sihke davvisápmelaččat, julevsápmelaččat ja lullisápmelaččat.