– Mus lea hirbmat buorre dovdu. Munnje lea hirbmat buorre leat ovttas daiguin geat dohkkehit mu nu mo mun lean. Dáppe in dárbbaš čiehkat dovdduidan, lohká Satu Kiviniemi NRK Sápmái.
20-jahkásaš avvillaš nieida lea vuosttaš geardde mielde Pride-doaluin, ja sutnje lea áibbas erenoamáš go dát dollo dušše njeallje miilla eret su ruovttus.
– Mun áigon diibmá jo searvat, muhto dalle doalut sirdojuvvodje Norgga beallái (Guovdageidnui), čilge son.
– Illá dusten muitalit
Nuorra sámenieida muitala ahte son moadde jagi čiegadii duohtavuođa iežas lagamusaide ovdalgo duosttai muitalit, ahte son ráhkisvuođaeallima dáfus ii leat justa seammálágán go buot earát.
– Mun ledjen dalle 17 jagi. Ovtta eahkeda jerren eatnis, ahte sáhtášingo suinna háleštit muhtin duođalaš áššis. Dan gal logai heivet. Dalle mun sutnje muitalin, ahte mus lea nieidaskibir ja ahte mun lean dakkár gii liikon iežan sohkabeale olbmuide, inge gánddaide.
Satu Kiviniemi hállá mojinjálmmiid go muitala siskeleammos dovdduidis birra.
– Munnje lei nu buorre go sihke eadnán ja áhččán nu álkit dohkkeheigga dan maid muitalin. Dat lea mu eallima dahkan olu geahppaseappon, dovddaha Kiviniemi.
Olu dovddut
Avvilis bajásšaddan Anne Olli (24) dat jođiha Sápmi Pride 2017. Sus ledje maid olu dovddut go rabai dán vahkkoloahpa doaluid.
– Diibmá ledjen vuosttaš geardde mielde Pride-doaluin gos iežan gillii beasan hállat olbmuiguin. Dat lei áibbas erenoamáš. Dál go dáppe Suoma bealde lea dát dáhpáhus, nu lahka mu ruovttu, de lea dat áibbas erenoamáš, logai Olli rahpansártnistis.
Sunna Valkeapää lea maid okta lágideaddjiin. Son ii nagadan bissehit gatnjaliidis go manai lávddi ala hállat.
– Mun hálidedjen čierrut oidnosis ja rahpasis vai olbmot oidnet ahte earát maid dahket dan. Čierrun čájeha dan bákčasa mii lea min siste. Danne go mii leat dan servodaga diihtii gártan dan čiehkat ja hoigat eret. Danne lea buorre ja dearvvašlaš luoitit dán bákčasa boahtit olggos. Ja čierrut, logai son.
Satu Kiviniemi mielas ii oru váttis čilget manne dán vahkkoloahpa Sápmi Pride lea nu erenoamáš dáhpáhus.
– Miihan buohkat leat dušše olbmot, beroškeahttá das gean mii ráhkistat.
Beaivet ihttin lea Sámi Pride 2017 stuorámus dáhpáhus. Dalle dollo ráidovázzin dahje paráda Anáris.