Duorastaga álggii dán jagáš Márkomeannu-festivála ja festivála bistá gitta sotnabeaivái. Dán festiválii lea maid Sápmi Pride boahtán. Leammuid Lemet Ande ja Davvet Brun-Solbakk leigga vuovdime Sápmi Pride biergasiid.
Leammuid Lemet Ande muitala ahte sii leat vuovdán lávkáid ja veaskkuid.
– Ikte mii vuvddiimet buot leavggaid. Eai leat go moadde lávká ja capsat dahje gahpirat vel báhcán. Mun in lean vuordán ahte mii galggaimet ná olu vuovdit, dat lea erenomáš. In lean ge vuordán ahte olbmuin galggai leat ná positiivvalaš responsa, dadjá son.
- Loga maid:
Vuovdán olu gálvvuid
Olu olbmot leat oastán iešguđetge lágan Sápmi Pride biergasiid, ja Leammuid Lemet Ande soaitá diehtit manne olbmot ostet daid.
– Mun jáhkán mii leat vuovdán olu gálvvuid go Márkomeannu lea bidjan plakáhta mas guokte dievdoolbmo cummástallet, ja dat soaitá maid movttiidahtten olbmuid doarjut min, muitala son.
Leammuid Lemet Ande mielas lea Márkomeannu-festivála dat buoremus festivála.
– Márkomeannu lea ovddimusas buot sámi festiválain, go sii leat maid váldán mielde LHBT-minoritehta mielde ja dat mearkkaša erenomáš olu midjiide go ná buori doarjaga oaččut dán festiválas, dadjá son.
- Loga maid:
Olbmuin eai leat ovdagáttut
Soai čilgeba ahte soai eaba leat vásihan ovdagáttuid festiválas.
– Mun in leat vuohttán makkárge ovdagáttuid, muhto leat ujus olbmot geat vázzet sápmi pride rámbuvrra birra ja eai duostá boahtit hubmát minguin. Sii vázzet golbmii-njelljii ovdal go dustet boahtit sisa. Dat lea hui somá ja erenomáš oaidnit movt olbmot lahkonaddet min, muitala Leammuid Lemet Ande.
Leammuid Lemet Ande lea bargan eaktodáhtolažžan Márkomeannu-festiválas ja dasa son gal liiko.
– Dat lea hui somá go mun beasan dalle vásihit olu ja deaivat olu olbmuid. Dat lea stuora dáhpáhus munnje beassat leat dákkár rábas ja buori festiválas, gos lea buorre musihkka ja gos leat siivos olbmot, dadjá son loahpas.