Hopp til innhold

Sápmi Pride lea ceggen rámbuvrra Márkomeannus

Ja doppe sii vuvdet iešguđetge lágan báiddiid ja eará Sápmi Pride biergasiid.

Sami pride stand

Davvet Brun-Solbakk (gurut bealde) ja Leammuid Lemet Ande leigga vuovdime Sápmi Pride biergasiid Márkomeannu-festiválas.

Foto: Mathis Eira / NRK

Duorastaga álggii dán jagáš Márkomeannu-festivála ja festivála bistá gitta sotnabeaivái. Dán festiválii lea maid Sápmi Pride boahtán. Leammuid Lemet Ande ja Davvet Brun-Solbakk leigga vuovdime Sápmi Pride biergasiid.

Leammuid Lemet Ande muitala ahte sii leat vuovdán lávkáid ja veaskkuid.

– Ikte mii vuvddiimet buot leavggaid. Eai leat go moadde lávká ja capsat dahje gahpirat vel báhcán. Mun in lean vuordán ahte mii galggaimet ná olu vuovdit, dat lea erenomáš. In lean ge vuordán ahte olbmuin galggai leat ná positiivvalaš responsa, dadjá son.

Vuovdán olu gálvvuid

Olu olbmot leat oastán iešguđetge lágan Sápmi Pride biergasiid, ja Leammuid Lemet Ande soaitá diehtit manne olbmot ostet daid.

– Mun jáhkán mii leat vuovdán olu gálvvuid go Márkomeannu lea bidjan plakáhta mas guokte dievdoolbmo cummástallet, ja dat soaitá maid movttiidahtten olbmuid doarjut min, muitala son.

Leammuid Lemet Ande mielas lea Márkomeannu-festivála dat buoremus festivála.

– Márkomeannu lea ovddimusas buot sámi festiválain, go sii leat maid váldán mielde LHBT-minoritehta mielde ja dat mearkkaša erenomáš olu midjiide go ná buori doarjaga oaččut dán festiválas, dadjá son.

Olbmuin eai leat ovdagáttut

Soai čilgeba ahte soai eaba leat vásihan ovdagáttuid festiválas.

– Mun in leat vuohttán makkárge ovdagáttuid, muhto leat ujus olbmot geat vázzet sápmi pride rámbuvrra birra ja eai duostá boahtit hubmát minguin. Sii vázzet golbmii-njelljii ovdal go dustet boahtit sisa. Dat lea hui somá ja erenomáš oaidnit movt olbmot lahkonaddet min, muitala Leammuid Lemet Ande.

Leammuid Lemet Ande lea bargan eaktodáhtolažžan Márkomeannu-festiválas ja dasa son gal liiko.

– Dat lea hui somá go mun beasan dalle vásihit olu ja deaivat olu olbmuid. Dat lea stuora dáhpáhus munnje beassat leat dákkár rábas ja buori festiválas, gos lea buorre musihkka ja gos leat siivos olbmot, dadjá son loahpas.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.