NRK Meny
Normal

Sápmi Pride Kárášjogas

Otne álge Sápmi Pride doalut Kárášjogas, ja prošeaktajođiheaddjis leat olu vuordámušat vahkkolohppii.

Dán vahkkoloahpa lea Kárášjogas Sápmi Pride. Oainnat prošeaktajođiheaddji ja su áhkku dán filmmas.

RÁMIS: Máret Stueng lea rámis go su mánáidmánná lea mielde lágideamen Sápmi Pride doaluid Kárášjogas.

Leat sámi homofiillat, lesbbat, guovtteseksuálat, transvestihtat ja queer:at geat deaivvadit Kárášjogas dán vahkkoloahpa. Bohtet olbmot sihke suomas, Ruoŧas ja Norggas deike doaluide.

Lea nubbi jahki go Sápmi Pride lágiduvvo. Diibmá lágiduvvui Sápmi Pride Gironis.

Niegut ollašuvvan

Leammuid Lemet Ánde lea prošeaktajođiheaddji Sápmi Pride:as. Son lea bargan ja rahčan olu vel šaddet Sápmi Pride riemut Kárášjogas. Son muitala ahte Sápmi Pride Kárášjogas lea leamašan su niehku, ja ahte dál lean ollašuhttán niegu.

– Lea buorre dovdu go lea Sápmi Pride Kárášjogas, dadjá Lemet Ánde.

Vuordámušat

Lemet Ánde vuordá olu olbmuid parádii mii vuolgá ráđđeviesus Lávvardaga golmma áigge. Son muitala ahte olbmot márkanis leat leamašan hui positiiva parádii, ja ahte sii leat jearahan sus galle áigge dat lea ja gos dat lea.

Mu vuordámušat leat ahte šaddá glitter ja glamour Kárášjogas, ahte olbmuiguin lea buorre dillii. Sávan ahte Kárášjoga álbmot váldá bures vuostá daid geat bohtet.

Leammuid Lemet Ánde

Rámis

Máret Stueng lea rámis go su áhkkut lea mielde lágideamen dán jagáš Sápmi Pride doaluid Kárášjogas. Son muitala ahte Lemet Ánde lea olu jagiid bargan homofiillaid ovddas. Áhkku muitala ahte su mánáidmánná ii atte vuollái.

– Mu boarráseamos mánáidmánná, ii leat ballan ii goasege, dadjá Máret Stueng.

Ivdnás bivttasbáttit

Sápmi Pride oktavuođas lea Kárášjoga márkan čiŋahuvvon ivdnás bivttasbáttiin. “Bivttas báddi- Šiegavuohta” leat servodat doaimma, man Ilar Gunilla Persson ja Heidi Lunabba leaba álggahan. Prošeakta lea dál Kárášjogas.

Dáiddár guovttos hástiba olles Sámi searvat dása. Ulbmil prošeavttain lea čájehit ahte doarjjut bodnju rivttiid.