Kapteidna Erik Berthelsen ii deaivan go bážii stolpui ja olggos. Dan nuppi gis válddii Morten Lund, ja su spáppa gis fáhtii molaalmmái hui álkit.
Dan ovdalaš lei Assura-joavku báhčán mola, muhto duopmár dagai boastut go ii dohkkehan dan. Dan oaivvildii goit ge ekspeartakommentator Nils Henrik Sikku.
– Čikče hejodit
Sikku mielas čievččai Sápmi issoras hejodit, ja son jáhká unnán vejolašvuođa dain beassat viidásabbot finalii.
– Dalle gal fertešii Sápmi vuoitit dan guovtti boahtte čiekčama. De gal lea vejolaš, muhto dalle galget duođas váldit bearjadatmáčča mii lea Padania vuostá, lohká Sikku.
Beahtahallan hárjeheaddji
Sápmi hárjeheaddji Morten Pedersen gal lei šlundon čiekčiid dihte, go eai máhttán dan ge maid ovdagihtii ledje hárjehaddan.
– Go eat báže mola dakkár stuorra vejolašvuođaid oktavuođas go ráŋggáštusčievččasteamis, de gal eat vuoitte čiekčamiid. Dál mii ferteseimmet vuoitit guokte čiekčama jus finalii galggažeat beassat. Ja jus vuoitit galgat, de fertet dieđusge báhčigoahtit molaid, lohká Pedersen.