NRK Meny
Normal

Sápmelaš ráppár ávžžuha eamiálbmotnuoraid ávvudit kultuvrraset

SlinCraze čuoččui mannan vahkus lávddi alde New Yorkas, ja sus lea čielga ávžžuhus eamiálbmotnuoraide.

Nils Rune Utsi

Nils Rune Utsi dahje SlinCraze lea bajásšaddan Máze gilážis Guovdageainnu suohkanis. Mannan vahkus son lei lávddi alde New Yorkas.

Foto: Pia Tøhaug / NRK

Nils Rune Utsi (25) lea šaddan eanemus dovddus ártistanamain SlinCraze. Mázelaš lei mannan vahkus máilmmegávpogis New Yorkas, gos son guoimmuhii olbmuid geat oassálastet Ovttastuvvan Nášuvnnaid bissovaš álgoálbmotforumas.

– Eamiálbmotnuorat galggašedje ávvudit kultuvraset, eaige galggašivčče heahpanaddat. Mu mihttomearri lea váikkuhit dasa, ahte eamiálbmotnuorat leat rámis kultuvrrasteaset, logai UN News Centre neahttasiidui ovdal konseartta.

Videos oainnát SlinCraze New Yorkas:

Givssiduvvui skuvllas

Nurorra ráppár bajásšattai Mázes Finnmárkkus ja su bargu musihkain álggii go son rumašlaččat ja silolaččat givssiduvvui skuvllas.

Son dolkkai dása, ja su čoavddus váivves dillái lei čállit teavsttaid ja ráppet. Dalle riegádii lávlla «Eallin lea nu váttis».

Nils Rune Utsi lea doallan konsearttaid máŋgga skuvllas Norggas, gos son lea hállan givssideamis ja das manne son bargagođii musihkain. Son muitalii mo olbmot dokkehišgohte su musihkas dihtii.

Teavsttat leat dávjá huksejuvvon seammáláhkái go ártistta Eminem teavsttat leat.

SlinCraze lea earret eará guimmuhan Norgga gonagasa 70-jagi beaivvis ja máŋgga festivalas miehtá riikka.

Diibmá gárvvistuvvui 70 minuhttasaš dokumentárafilbma «Arctic Superstar», man govvejeaddji Kristoffer Kumar, govvejeaddji Martin Rustad Johansen ja filbmadahkki Simen Braathen leat ráhkadan.

Filbma lei Romssa riikkaidgaskasaš filbmariemuid rahpanfilbma jagis 2015.

Reportása SlinCraze birra espánjagillii: