Sápmelaš duogáš dagaha moivviid

Jovnna Ánde Vest lea 40 jagi juo čállán girjjiid sámegillii. Dán jagi mielde almmustuvvet sus navdimis guokte girjji "Astrid ja Anton". Mearrasámis dat dáin lea sáhka, ja girjjiin lea fáddán dáruiduhttin ja muittohuvvan.

Jovnna Ánde Vest
Foto: Piera Balto
Anne Olli
Journalist

Mearrasámis dat lea sáhka su ođđa girjjiin, vuosttaš oassi lea juo deaddileamis, ja nuppi lea ain čállimin. Girjjiid váldopersovnnat leaba Astrid ja Anton. Astrid lea Antona áhkku. Ántona riegádeapmi dagaha oalle ollu moivviid, dannego sus leat seiva čáhppes vuovttat ja čalmmitge leat seamma čáhpadat go su vuovttat. Rikkes báŋkoalbmá bearrašis leat buohkain čuvges vuovttat. Danne gándamánná dagaha ipmašiid, go illá sáhttet jáhkkit ahte čielgá čuvgesliikkat ja vuovttat skandinavalaš olbmuide sáhttá riegádit diekkáraš čáhppesvuovttat mánná.

Dáruidahttin ja muittohunnan fáddán

Girjjis lea dáruiduhttin váldo-áššin, muhto lea maid muittohuvvamis sáhka. Čáhppesavuovttat máná riegádeapmi lea leamaš oalle traumáhtalaš vásáhussan dán fiinna bearrašii, ja dát dagahii Astrid áhkku imašlaš mielladillái, son muittohuvvagoahtá dien hušša giežil. Son báibmá oruskeahttá dan seamma, ja dát su báibman darvána Antona millii. Ollesolmmožin dutkagoahtá son lagabui áhkkus báibmama. ja dalle easka áddegoahtá iežas bearraša duogážis, sii han leat sámesogalaččat. Dát čiegusvuohta dat moivváskahtii Astrid-áhkku, fuomáša son.

Sámediggi ruhtada girjjiid

Jovnna Ádde Vest girjjiide "Astrid ja Anton", dasa lea Norgga Sámediggi juolludan 297 000 ruvnnu deaddilandoarjjan. Girječálli lea eret Roavvesavvonis, muhto ássá Pariissas, gos son lea bargan girječállin ja jorgaleaddjin. Dál muitala iežas leat ollen ealahahkii, muhto čállit son gal ain áigu.

Dán rádjai lea Jovnna Ánde Vest čállán ovcci girjji, go rehkenasttá mielde girjjiid maid dál lea čállán. Ii son gal girječállimiin gal livčče birgen, ovdal fertii son váldit olu jorgalanbargguid vel lassin vai birgii ruđalaččat. Dál son gal eallá čállit go dál lea son ollen ealáhahkii, nu muitala girječálli Jovnna Ánde Vest.