Sámedikkejienastiddje gudi årru suohkanijn gånnå li binnebu gå 30 ulmutja sámedikkeválga jienastuslågon, hæhttuji árabut jienastit jus sijá jiena galggi dåhkkiduvvat.
Arnhild Lindbach, Hábmeris galggá juo dán vahko sámedikkeválggaj jienastit.
Foto: Harrieth Aira / NRKHábmerin, Nordlándan årru Arnhild Lindbach gut hæhttu árabut jienastit.
– Mån dal lidjiv sihtat sijdan jienastit válggabiejve. Valla dálla hæhttuv mannat Hábmera suohkana guovdásjbájkkáj, Oppájddáj jienastittjat sámediggáj, ja dav hæhttuv mån dahkat juo dálla, iv máhte vuorddet válggabæjvváj, subtsas Arnhild Lindbach.
Valla stuorradikkeválggaj de máhttá sån suv sijddabájken, Ulsvágen jienastit, válggabiejve jus sån dav hálijt.
- Lågå aj:
Láhkarievddadus
Sivva dási le láhkarievddadus mij la boahtám vaj båhtusa sámedikkeválgas galggi gárvvása sæmmi båttå gå båhtusa stuorradikkeválgas.
– Åvddål máhtij mannat viehka guhkes ájgge åvddål båhtusa sámedikkeválgas lidjin gárvvása. Vájk vahkojt såjtij mannat, subtsas Sámedikke åssudakdirektørra, Randi Romsdal Balto.
Sámedigge ávttji ulmutjijt gudi árabut hæhttuji jienastit, sij dav dahki nav árrat åvddål válga gå máhttelis.
– Ájnas la diehtit jut duv jiedna la jåksåm dan bájkkáj gånnå jiena lågåduvvi åvddål válgga nåhkå. Jus jiedna ij la dåhku jåksåm de dat ij lågåduvá ja dalloj de dat bálkestuvvá, javllá Romsdal Balto.
Árabut jiena galggi má maŋenagi rájaduvvat påstajn dåhku gånnå da lågåduvvi.
Ja jus ga Arnhild luluj sávvat sån luluj sámedikkeválggaj jienastit esski válggabiejve, de gåjt sån juo dán vahko ájggu jienastit.
– Mån ájgov dán vahko jienastit. Ulmusj má hæhttu ber njuolgadusájt tjuovvot, jienastit la ájnnasamos, javllá Arnhild Lindbach.
GULLDAL ÅLLES ÁSSJEV DÁNNA:
Sån hæhttu arabut jienastit
