Jáhkket einnostussii – ballet viesuid fierrat fiervái

– Mun lean gullan ahte muhtun lea einnostan Sámmolvári fierrat fiervái, dadjá Sven Persson.

Einnosteapmi čuožžilii jagi 1963, go muhtun nissonolmmoš oinnii oainnáhusas Sámmolvári gili čierasteame fievrái.

Jagi maŋŋel manai eananrihtu seammá báikkis, mii doalvvui biillaid ja áittiid merrii.

Nuppes go einnostus fas šattai sáhkan lei jagi 1975 go eiseválddit huksejedje E6-geainnu Sámmolvári gili buohta, Davvi Romsii. Dalle balle ássit johtolaga dagahit riđu.

45 jagi maŋŋel oaččui einnostus fuomášumi goalmmát háve, go eiseválddit diibmá huksejedje rihtomuvrra Sámmolvárrái. Vaikko eanas sámmolvárrilaččat ledje vuostá huksema einnostusa geažil, nu muitalit máŋga sámmolvárrilačča geaiguin NRK lea hupman.

– Ássit jáhkket einnostussii go sii leat oaidnán láirri Sámmolvári eatnama vuolde ja danin jáhkket báikki fierrat fiervái, dadjá Persson.

Sotnabeaivve borgemánu 23 beaivvi fierái 80 mehtara guhko oassi rihttosihkárstinrusttegis, maid máŋggas leat atnán bálgán go vulget váccašit.

Okta gii láve váccašit dákko lea ruoŧŧelaš Sven Persson, geas lea eamit Sámmolváris eret. Sudnos lea barta báikkis gos orodeaba gesiid.

Tromssa ja Finnmárkku filkkas leat eananriđut leamaš roassun ássiide sihke Dálbmeluovttas, Ivgus ja Reaššegeažis.

NČE lea guorahallan eatnama ovdal huksema

2019:s válbmii Norgga čázádat- ja energiijadirektoráhtta (NČE) dahjege Norges vassdrags- og energidirektoratet (NVE) rihtomuvrra Sámmolvárrái.

Seniorinšenevra Anders Bjordal jođihii huksenprošeavtta. Son oaivvilda ahte sii leat vuhtiiváldán sámmolvárrilaččaid balu.

– Vuosttaš maid mii barggaimet lei dárkkistit eatnama. Mii válddiimet sihke iskosiid eatnamis ja árvvoštalaimet eatnama ovdal go álggiimet hukset. Nu ahte mii leat vuhtiiváldán ássiid balu, čilge son.

Bjordal čuoččuha Sámmolváris dan muttos nanu eatnama ahte dat gierdá muvrra.

• Loga: Innbyggerne frykter NVE kan forårsake nytt storras

Muvra mávssii 17 miljovnna hukset. Dat lea 312 mehtera guhku ja ceggoseamos oasit leat 12 mehtera alu. Sullii 80 mehtera guhkkosaš oassi gahčai borgemánus.

Vahku ovdal go muvra luittii, de ledje čáhccás arvvit Sámmolváris, muhto seniorinšenevra oaivvilda muvrra gierdat čázi.

NČE áigu guorahallat manne muvra ii bisson čoahkis.

Čieža riđu mannan

Sivvan manne Gáivuona suohkan lea ovttas NČE:ain huksen muvrra Sámmolvárrái, lea dan dihte go báikkis leat 1882 rájes leamaš guhtta muohtariđu, mat leat mannan váris gitta fiervái.

1964 manai báikkis eananrihtu mii billistii viesu ja ovtta eará viesu fertejedje sirdit. Rihtu doalvvui sihke biillaid ja áittiid merrii.

Maŋemus rihtu manai 1992:s.

2018 huksii Stáda geaidnodoaimmahat Nuortanjárgga tunnealla, go E6 geainnu dávjá fertejedje giddet muohtariđu geažil. Tunnealla ulbmil lea sihkkarastit biilavuddjiid vai eai sorbmahuva rihtu geažil.

NČEa Anders Bjordal čilge ahte sii leat atnán geđggiid rihtomuvrii maid leat viežžan tunneallas, go Nuortanjárga tunnealla huksejuvvui.

• Loga: Frykter at snøskredsikringstiltak fører til jordras

Persson jáhkká iežaska birget

Ruoŧŧelaš Sven Persson lea náitalan sámmolvárrilaččain, muhto soai eaba oro Gáivuona suohkanis, Sámmolváris, earágo gesiid. Vaikko eamit lei vuostá rihtomuvrra, de son jáhkká sudno birget bures boahtteáiggis.

– Mun jáhkán moai birgejetne vaikko muvra ii lean mu eamida miela mielde, dadjá Persson buriin mielain.