NRK Meny
Normal

Sáminuorra sebrulattjajt tjoahkki

Dán vahko gietjen de nuorajlihtto jáhketjåhkanimev doallá. Låsså tiemá li ierit válljidum, ja ulmme l suohtastallat ja niegadit.

Sáminuorra

Nuorajlihtto Sáminuorra nuorajt tjåhkanibmáj gåhttju. Gåvvå l ietjá tjåhkanimes.

Foto: Ol-Ánte Sikku

Bierjjedagás sådnåbæjvváj de Sáminuorra 53. jahketjåhkanimev Saadteskenjuanin, Svierigin ásat. Nuora niellja rijkajs båhti.

Tjåhkanime jådediddje Sanne-Ristin Bengtsson le guhtta jage lihttuj sæbrram. Niellja jage l stivran doajmmam ja dán jage l jådediddje goalmádis. Jådedittjat le dal hárjjánam.

Sanne-Risten Bengtsson

– Ep la ållu dudálattja gåktu Sámedikken mærrádusájt tjadádi. Dav galggap tjåhkanimen dágástallat, javllá Sanne-Ristin Bengtsson.

Foto: Privat

– Iv la goassak tjåhkanime åvddålå náv loajttot dåbddåm. Ij håhkkånibmáj maná jus lav majdik vajálduhttám. Dav lav åtsådallam, javllá sån Svieriga radioj.

Nuoraj giella sebrudagán gullu

Akta lihto ulmijs le politihkas oasev válldet, ja gæhttjalit sebrudagáv nuoraj vuojnojs bájnnit. Bengtssona mielas de lihtto buorre láhkáj dav barggá, ja ulmutja nuorajda gulldali.

– Le ájnas nuora sámij rievtá vuojnnusij båhti.

Lihtto duola dagu ájrrasij Sámedikke ållestjåhkanimijt tjuovvu.

– Buoragit doajmmá. Navti oadtjop diehtep ienebuv Sámedikke mærrádusáj birra, javllá Bengtsson.

Vargga gietjav tijma bussan

Ailo Thomassen, gudi Jielleváren årru, hæhttu vargga gietjav tijma bussan tjåhkkåhit gå Saadteskenjunnjáj galggá jåvsådit.

Ailo Thomassen

Ailo Thomassen sihtá ådå rádnajt oadtjot.

Foto: Marica Blind / SVT

– Le guhkás dåk, javllá sån NRK Sábmáj.

Birrusin 65 nuora galggi tjåhkanibmáj sæbrrat. Thomassen ij vuojga politihkkaj berusta. Manná rádnastalátjit ietjá sáme nuoraj.

– Dåbdåv juo moaddásijt gudi dåk galggi. Nuora Oarjje-Svierigis ja ietjá bájkijs sidáv iejvvit. Gájka danna æjvvalij, joarkká Thomassen.

Niegadit

Sæmmi båttå de nuorajkonferánssa «Noeri håhkoe-Ungas drömmar» ásaduvvá. Åvdep jagijt li tjåhkanime låsså ássjijt tjalmostam, duola dagu juridihkalasj ássjij birra ja riektáj birra. Dán jage de hiebaj ávvo-tiemáv válljit.

– Sihtap niegadit vehi, ja låsså ássjijs båttåv válldet, hæjttá Bengtsson.

Gehtja filmav majt NuorajTV l dahkam 2014 jáhketjåhkanimes (ålgoldis lænkka):