Hopp til innhold

RiddoDuottar Musea ođđajagi vejolašvuođat

RiddoDuottar Musea/RDM ovttastusas lea dál vejolašvuohta doaibmagoahtit dievaslaččat, danne go stivrrajođiheaddjit leat lonuhuvvon, ja stivra virgáda ođđa direktevrra Sámiid Vuorká-Dávviriidda/SVDii. Nu muitala RiddoDuottar Musea ovttastusa ođđa jođiheaddji Martin Rimpi.

Martin Rimpi

DIREKTEVRA: Martin Rimpi lohká vuosttas bargun dán ođđa jagis leat gávdnat ja bidjat ođđa direktevrra RiddoDuottar Museai.

Foto: NSR

RiddoDuottar Musea/RDM ovttastussii gullet Guovdageainnu-, Jáhkovuona-, Porsáŋggu- ja Kárášjoga musea Sámiid Vuorká-Dávvirat. Dán ovttastusas lea leamaš guozanin dat go Kárášjoga Sámiid Vuorká-Dávvirira/ SVD eaiggátstivra ja RiddoDuottar Musea stivra eai riekta gulahallan. SVD ovddeš eaiggátstivra oaivvildii RiddoDuottar Musea stivra ii bargan doarvái SVD ovddas.

SVD eaiggátstivra celkkii SVD erert RiddoDuottar Musea ovttastusas, danne go oaivvildedje iežaset birget buorebut, jos ieža besse ollásit stivret SVDa.

Ođđa olbmot SVD-eaiggátstivrras ja RiddoDuottar Musea-stivrras

Dál go SVD eaiggátstivrii lea válljejuvvon eará jođiheaddji ja go RiddoDuottar Musea stivriige lea válljejuvvon ođđa jođiheaddji, de navdá RDM ođđa stivrrajođiheaddji Martin Rimpi ahte dán jagi de njulget buot čuolmmat mat leat leamaš RDM-stivrra ja SVD-eaiggátstivrra gaska.

Rimpi navdá dál RiddoDuottar Musea doaimma joatkit fas nu go ovdal. Nu ahte SVD galgá gullat RDM ovttastussii, nu go ovdalge lea dahkan.

Virgádit ođđa direktevrra

Dál lea RDM-stivrras storámus ášši gávdnat ja virgádit ođđa direktevrra. Ohcanáigi direktevrra virgái lea dán mánu 19. beaivi, ja Rimpi doaivu iežaset gávdnat olbmo dán virgái, gii nagada hápmet dán organisašuvnna sin dáhttu mielde.

Son ferte gávnnahit mo háhkat ođđa mágasiinnaid gosa rádjet dáidagiid ja dávvirid, danne go jos galggaš oažžut ruovttoluotta Norgga Álbmot Museas dološ sámi dávviriid, de gáibidit Álbmot Museas ahte museain leat dohkálaš mágasiinnat gos rájadit dávviriid. Danne ferte dát bargu vuoruhuvvot, seammás go ohcet dálu maid sáhtašedje geavahit rájadit dáidagiid maid Sámediggi lea oasttán boahtteáigái rádjui.

Gula dás maid Riddoduottar Musea ođđa direktevra Martin Rimpi muitala leat stuorámus hastalussan RiddoDuottar Museai dál ođđa jagis

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.